ІІМ қызметкерлері Жеңіс күніне орай қызметтік борышын атқаруда қаза болған қызметшілерге арналған Монументке гүл шоқтарын қойды (Фото)

8 Мамыр, 2015 18:21

Отан қорғаушылар күні мен Жеңіс күніне арналған мерекелері қарсаңында қызметтік борышын атқаруда қаза болған ішкі істер органдары мен ішкі әскердегі әскери қызметшілерге арналған Монументке гүл шоқтарын қою рәсімі болып өтті, деп хабарлады ҚР ІІМ.

Қатысушылар Ұлы Отан соғысында қаза болғандардың рухын бір минуттық үнсіздікпен ұлықтады. Монументке гүл шоғырлары қойылған соң, ардагерлер мен шараға шақырылушылар алдында астаналық полиция горнизонының құрылымдары мен ҚР Ұлттық гвардиясы шеру жасап өтті.

Салтанатты шеруден кейін ІІМ Клубында салтанатты жиын өтті. Жиын барысында Ішкі істер министрінің орынбасары полиция генерал-майоры Рашид Жақыпов Ұлы Отан соғысының ардагерлерін құттықтап, қызметтік міндеттерін адал атқарғаны үшін және Отан қорғаушылар күні мен Жеңіс күнін мерекелеуге байланысты Орталық аппараттың және ІІО аумақтық бөліністерінің қызметкерлеріне наградалар тапсырды.

«Отанымызға деген шексіз адалдық, табандылық пен қажыр-қайратымыз сұрапыл соғыста жеңіске жетуге жетеледі. Сондықтан да фашизмге қарсы соғысқан аға ұрпақ Жеңісінің ұлылығы жыл өткен сайын жарқырай түседі»,- деп атап өтті Рашид Жақыпов.

Іс-шараға келушілер ішкі істер органдарының музей қорларын пайдалана отырып, ІІМ Клубының фойесінде ұйымдастырылған «Жеңіс жолымен!» тақырыбында фотодеректі көрмені тамашалады.

Салтанатты шара ІІМ мәдени орталығының, ҚР Ұлттық гвардиясы ән-би ансамблінің мерекелік концертімен аяқталды.