Қазақстанның қайта өңдеу саласында 15 жоба жүзеге асырылуда - АШМ
8 Мамыр, 2015 10:34
Қазақстанның қайта өңдеу өнеркәсібі саласы үшін құны 190 миллиард теңге болатын 15 жоба жүзеге асырылуда, деді Ауыл шаруашылығы министрі Асылжан Мамытбеков Орталық комммуникациялар қызметінде өткен баспасөз-мәслихатында.
«Бүгінгі таңда ең жоғарғы қосылған құнды қамтамасыз етуші ретінде қайта өңдеу өнеркәсібі саласына басымдық беріліп отыр. Осы ретте Мемлекет басшысының «Нұр Отан» партиясының 16 съезінде айтқан бастамаларын жүзеге асыру үшін ірі шетелдік инвесторлардың қатысуымен 15 жобаны жүзеге асыру көзделіп отыр»,-деді А.Мамытбеков.
Оның сөзінше, жобалардың жалпы құны 190 миллиард теңге.
«Ет өңдеу мен мал етін өңдеу бойынша 4 жобаны жүзеге асырып, құны 60 миллиард теңге болатын 3 құс фабрикасын салу жоспарланып отыр. Өз кезегінде ол импортты 50 пайызға дейін қысқартуға мүмкіндік береді. Сонымен қатар тағы сүтті қайта өңдеу, астық дақылдарын терең өңдеу саласы бойынша бірқатар жобаларды жүзеге асыру жоспарланып отыр»,-деді министр.
Анар Тәңірқұлова
