Ұшқыштар әуеде 70 санын жазды

7 Мамыр, 2015 11:58

Бүгін «Қазақ Елі» басты алаңында Отан қорғаушы күні мен Ұлы Отан соғысындағы Жеңістің 70-жылдығына арналған әскери шеру өтті. Ауқымды шеруге 5000-нан астам әскери қызметші, саны 220-ға жуық қазіргі заманғы қару-жарақ пен әскери техника, 70 бірлік заманауи авиациялық техника қатыстырылды.

Сонымен, шеру ҚР Мемлекеттік туы мен Жеңістің Қызыл туының дәлме дәл көшірмесін ортаға салтанатты түрде алып шығу рәсімінен басталды. Жеңістің Қызыл туын осыдан 70 жыл бұрын отандасымыз Р.Қошқарбаев пен онын жерлесі Г.Булатов Рейстахқа тіккен болатын. Жауынгерлік ту Қазақстанға Мәскеудің Тағзым ету тауынан әкелінген.

Жалпы, шеруде ҚР Қарулы Күштерінің қазіргі келбетімен қатар Ұлы Отан соғысы жылдарындағы армия және қару түрлері көрсетілді. Олар Қызыл армия киім үлгісіндегі әскери қызметшілер, санитар-нұсқаушы қыздар, 27 бірлік техника мен қару-жарақ (танк Т-34, ЗиЛ-157, ЗИС-2 және М-30 гаубицалы зеңбірек, танымал БМ-13, РС-30 «Катюша» және «Максим» пулеметі).

Осы ретте, Қазақстан Қарулы Күштерінің әскери қызметші қыз-келіншектері парадқа ерекше көрік берді. Парадқа қатысу үшін жалпы саны 186 қыз-келіншек іріктеліп алынды.

Бұдан басқа, әскери музыканттар кеңестік және қазақстандық сазгерлердің отызға жуық танымал әуендерін орындады, ал ұшқыштар жеке және пилотаждық топ құрамында жоғарғы пилотаж кескіндемелерін жасай отырып өз шеберліктерін көрсетті.

Ұшқыштар әскери шеру қонақтарына ерекше сый тартты, олар әуеде Жеңістің символы «70» санын жазды.

Индира Кауметова