Ақтөбеде Жеңістің 70 жылдығына орай өтіп жатқан фотокөрмеге 170-тен астам сурет қойылды
Облыстық өнер музейінен ашылған «Есімізде! Мақтанамыз!» атты фотокөрме-байқауын облыстық мәдениет басқармасы мен Кеңес Одағының батыры Әлия Молдағұлованың мемориалды музейінің ұжымы ұйымдастырды.
Онда ардагерлер мен соғыс жылдарындағы кезеңдерден 170-тен астам суреттер қойылған. Олардың авторлары еліміздің 8 облысы, Ақтөбе қаласы мен облыстағы аудандардан келген 50-ден астам әуесқой және кәсіби суретшілер.
«Суреттердің әрқайсысы – соғысты көрген азаматтардың тарихы мен тағдырлары. Сондай-ақ суреттер Ұлы Жеңіс пен тәуелсіздікке дейінгі аралықтағы өмірді жалғап жатыр десе болады»,-деді музей директоры Елена Қалтаева.
Көрменің ашылуына соғыс ардагерлері мен тыл еңбекерлері шақырылды. Оларды мерекелерімен облыстық мәдениет басқармасының бастығы Назира Табылдинова құттықтады. Ал Әлия Молдағұлованың музейі мерекенің алдында құнды жәдігермен толықты. Соғыс ардагері, Әлия Молдағұлованың туысқан нағашы ағасы Бейсенбай Хабиевтың қызы Ария Хабиева, музейге Әлияның әкесі майданнан киіп келген күртені сыйға тартты.
Көрменің ашылу салтанатында оның жеңімпаздары анықталды. Жеңімпаздар мен жүлдегерлер арнайы дипломдармен және құнды сыйлықтармен марапатталды. Тағы бірқатарына алғыс хаттар табыс етілді. Фотокөрме маусым айының ортасына дейін жалғасады. Көрме аяқталған соң оған қойылған барлық суреттер Әлия Молдағұлованың музей қорын толықтырады.
