«Алматы-Шу» телімінің өткізу мүмкіндігі үш еседен астам көбейеді – Р.Скляр
6 Мамыр, 2015 13:12
«Алматы-Шу» телімінің өткізу мүмкіндігі үштен астам есеге көбейеді, деді «Қазақстан темір жолы» ҰК» акционерлік қоғамының вице-президенті Роман Скляр Орталық коммуникациялар қызметінде.
«Транзитік әлеуетті, тасымал үдерісінің тиімділігін артыру үшін, «Алматы-Шу» учаскесі арқылы өтетін жүктердің жүру мерзімін қысқарту үшін биылғы жылдың сәуір айында екінші жолақтың құрылысы басталды», -деді Р.Скляр.
Оның сөзінше, жобаны жүзеге асырудың нәтижесінде өткізу мүмкіндігі 3 еседен астамға ұлғаяды.
«Жүк пойыздарының жүру уақытын екі есеге қысқарту ойда бар. Осы бағыттағы жұмыстарды аяқтау 2016 жылдың төртінші тоқсанына жоспарланып отыр. Бұл жоба да «Нұрлы жол» бағдарламасына енгізілді»,-деп қосты ол.
Бүтіндей алғанда, компания басшылығының айтуынша, мемлекеттік бағдарламаның аясында бірқатар жобалар жүзеге асырылды. «Жезқазған-Бейнеу» темір жол желісі салынып, нәтижесінде 13 станса мен 32 разъезд ашылды.
Ботагөз Айтжанова
