Ақтөбеде Кеңес Одағының батыры Малкеждар Бөкенбаевқа ескерткіш ашылды

Ардагер мүсіні ҚР ІІМ Малкеждар Бөкенбаев атындағы Ақтөбе заң институтының алаңқайына қойылды.

Ашылу рәсіміне Батырдың қызы Шахизада Бөкенбаева, немересі Дина, құқық қорғау органдарындағы әріптес-ардагерлер, Ақтөбе облысы әкімінің орынбасары Мұхтар Жұмағазиев қатысты.

Хабарламада аталып өткендей, Ақтөбеде ардагердің атына қала көшесі де берілген. Соғыс ардагері тұрған үйге мемориалдық тақта орнатылған.

ІСБ ақпараты бойынша, Малкеждар Бөкенбаев 1081-ші атқыштар полкінің взводын басқарды. 1944 жылы 20 шілдеде өз бөлімшесімен бірге ол Люблин-Брестовск шабуыл операциясы барысында Батыс Буг өзенін кесіп өтті. Офицер взводы польшалық Хелм қаласының шығыс жағында 22 шақырым қашықтықта орналасқан Дорохуск елді мекені ауданында тиімді позицияны алып, жау шабуылдарын қайтарды.

Қоян-қолтық ұрыста лейтенант Малкеждар Бөкенбаев фашист офицерін атып тастап, бесеуін тұтқынға алды. Шайқас кезінде ауыр жараланған ол ұрыс алаңынан кетпей, 1081-атқыштар полкының негізгі бөлімі келгенше взводты басқарды. Полтавадағы жеңісі үшін ол Кеңес Одағының батыры атағын алды.

Малкеждар Бөкенбаев ұзақ уақыт ішкі істер органдарында жұмыс істеді. Қызметін қарапайым учаскелік милициядан бастаған ол милиция майоры болып отставкаға кетті. Өмір бойы Ақтөбеде тұрды.