Әлемдік көшбасшылар Н.Назарбаевты ҚР Президенті болып сайлануымен құттықтады
Нұрсұлтан Назарбаевтың атына Қазақстан Президенті лауазымына сайлануына байланысты Швейцария Конфедерациясының Президенті Симонетта Соммаруганың құттықтауы келді.
С.Соммаруга Швейцария Федералдық кеңесі атынан Нұрсұлтан Назарбаевты Қазақстан Республикасының Президенті лауазымына қайта сайлануымен құттықтады.
«Қазақстанда реформаларды жүзеге асыру және демократияны нығайту бағытындағы Сіздің күш-жігеріңіздің барынша табысты болуын тілеймін. Елдің әл-ауқатын артыру жөніндегі саясатыңыз сәтті болады деп үміттенемін. Біз бұдан әрі де ортақ мүдде жолында елдеріміз арасындағы игі қарым-қатынасты дамыта алатынымызға сенімдімін. Швейцарияның Астанада өтетін «ЭКСПО-2017» көрмесіне қатысуы серіктестігіміздің аясын кеңейте түсуге тамаша мүмкіндік тудырады», – делінген жеделхатта.
А.Киска Нұрсұлтан Назарбаевты Қазақстан Республикасының Президенті лауазымына қайта сайлануымен құттықтады.
«Елдеріміз арасындағы достық қатынастар мен сындарлы диалог алдағы уақытта да өзара мүдделік бар барлық салада нығая отырып өрістей беретініне сенімдімін», – делінген жеделхатта.
Словакия Президенті Мемлекет басшысына мықты денсаулық, Қазақстан азаматтарының игілігі және елді бейбіт әрі орнықты дамыту жолындағы қызметіне табыс тіледі.
Х.Рухани Нұрсұлтан Назарбаевты Қазақстан Президенті лауазымына қайта сайлануымен құттықтады.
«Халық жасаған таңдау біздің екіжақты ынтымақтастығымыз аясында жоспарланған бағдарламаларды жүзеге асыруда жемісті жұмыс істеуімізге жақсы мүмкіндік береді», – делінген жеделхатта.
Иран Президенті Елбасыға мықты денсаулық пен зор табыс, ал достас Қазақстан халқына бақ-береке тіледі.
А.Ахмадзай Нұрсұлтан Назарбаевты Қазақстан Республикасының Президенті лауазымына қайта сайлануымен құттықтады.
Ауғанстан Президенті екі ел арасындағы ынтымақтастық аясының одан әрі кеңеюінен үміттенетінін жеткізіп, Мемлекет басшысына табыс, ал достас Қазақстан халқына бақыт пен құт-береке тіледі.
М.Рютте Нұрсұлтан Назарбаевты Қазақстан Президенті лауазымына қайта сайлануымен құттықтады.
«Сіздің Нидерландқа сапарыңызды және біздің 2014 жылғы наурыздағы сындарлы кездесуімізді жылы сезіммен еске аламын. Өзара саяси және экономикалық байланыстарды одан әрі дамыту елдерімізге игі ықпал ете алады, сондықтан мен өзара мүдделілік бар мәселелердің кең ауқымы бойынша сындарлы диалогымызды жалғастыратынымызға сенімдімін. Бұдан әрі де екіжақты және көпжақты негіздегі ынтымақтастықтан үміттімін», – делінген жеделхатта.
Нидерланд премьер-министрі Қазақстан кірісіп жатқан реформалар бағдарын да атап өтті.
«Сіздердің жаңғырту жөніндегі жоспарларыңыз голландтық компаниялардың инновациялық сипатымен сәйкеседі. Біздің компанияларымыздың көптеген салада, әсіресе энергетика, мұнай химиясы және ауыл шаруашылығында берік байланыстары бар. Алда бізді көптеген мүмкіндіктер күтіп тұрғанына сенімдімін», – делінген құттықтауда.
