Сенаторлар тұрғын үй-коммуналдық шаруашылықты субсидиялау туралы заң жобасын қарады

5 Мамыр, 2015 20:21

Парламент Сенаты Аграрлық мәселелер, табиғатты пайдалану және ауылдық аумақтарды дамыту комитетінің кеңейтілген отырысында «Қазақстан Республикасының кейбір заңнамалық актілеріне сумен жабдықтау және су бұру, тұрғын үй-коммуналдық шаруашылықты кредиттеу және субсидиялау мәселелері бойынша өзгерістер мен толықтырулар енгізу туралы» заң жобасы қаралды, деп хабарлады Сенат.

Құжат сумен жабдықтау және су бұру, жылумен жабдықтау салаларын мемлекеттік реттеу жүйесін жетілдіру, тұрғын үй-коммуналдық шаруашылықты қаржылық қолдау мақсатында әзірленген болатын.

Жобамен бірқатар заңнамалық актілерге өзгерістер мен толықтырулар енгізу көзделіп отыр.

Су кодексіне құқықтық қатынастарды реттейтін жаңа ұғымдар енгізіледі және сумен жабдықтау және су бұру саласындағы ұйымдастыру мәселелері регламенттеледі, сонымен қатар елді мекеннің сумен жабдықтау және су бұру жүйесін және (немесе) олардың құрамдас элементтерін иесіз деп танудың, сондай-ақ оларды есепке алудың тәртібі бекітіледі.

Сонымен қатар су тұтынушылардың сумен жабдықтау және су бұру саласындағы құқықтары мен міндеттері нақтыланды, сондай-ақ сумен жабдықтау және (немесе) су бұру жөніндегі ұйымдардың құқықтары мен міндеттері айқындалды.

Заң жобасымен сумен жабдықтаудың барлық кезеңдерінде – ауызсумен жабдықтау көздерін таңдаудан бастап су тұтынушыларға жеткізгенге дейінгі кезеңдерде ауызсудың сапасына қойылатын талаптар регламенттеліп, суды есепке алудың жалпы ережелері айқындалды.

Жер кодексіне объектілер салу үшін жер учаскесін таңдау актісін ресімдеу кезінде бұрыннан бар инженерлік коммуникацияларды берілетін жер учаскесінің шекарасынан тыс жерге ауыстыру жөніндегі нормалар енгізіледі.

Заң жобасымен Экологиялық кодекстің 225-бабына елді мекендерді сумен жабдықтауды және су бұруды жүзеге асырған кезде қоршаған ортаны қорғау саласындағы қатынастарды реттеу бөлігінде өзгерістер енгізіледі. Сонымен қатар жобамен «Энергия үнемдеу және энергия тиімділігін арттыру туралы», «Мемлекеттік мүлік туралы» және «Рұқсаттар және хабарламалар туралы» Қазақстан Республикасының заңдарына нақтылаушы нормалар енгізіледі.

Бюджет кодексіне ұзақ мерзімді және жеңілдікті бюджеттік кредиттеу, сондай-ақ сумен жабдықтау мен су бұрудың және жылумен жабдықтаудың дамуын экономикалық ынталандыру ретінде субсидиялауды жүзеге асыру түріндегі мемлекеттік қолдау нысандарын көздейтін нормалар енгізіледі.

Заң жобасы Палатаның қарауына жіберілді.

Барлық жаңалықтар