ШҚО-ның Күршім ауданында «Даңқ мемориалы» ашылады

 Күршім ауданы бойынша 5 315 боздақ Ұлы Отан соғысынан қайтпаған екен. Бұл мемориал батырлардың рухына тағзым және жас ұрпаққа үлгі-өнеге болсын, халыққа рух берсін деген ниетпен, 1941-45 жылдардағы фашистермен болған қанды шайқастан қаза болған күршімдіктердің құрметіне қойылып отыр. Кешеннің маңдайында «Ешкім де өлгендерді тірілтуге құдіретсіз, дегенмен де, оларды мәңгі есте сақтау біздің қасиетті парызымыз» деген Елбасы Нұрсұлтан Назарбаевтың сөзі мәрмәрға ойып жазылған.

Даңқ мемориалы кешенінің аумағы 5 гектарды құрайды. Екі секторға бөлінген аумақтың бір жағы тұрғындардың сейілдеуіне арналған. Онда гүлзар, субұрқақ, орындықтар мен аллея орналасқан. Ал екінші сектор боздақтарға арналған «қасиетті орын» саналады. Алыстан көз тартатын көрнекті мемориалдың қабырғасы бетоннан құйылған. Соғыстан қайтпаған 5 315 боздақтың аты-жөні «габбро» мәрмәрға түсірілген.

Мемориалдың құрмет тақта­сында қан майданда опат болған жауынгерлермен қатар, ауданнан шыққан Кеңес Одағының Батырлары, Социалистік Еңбек Ерлері, Қазақстанның Еңбек Ері, генералдар, аудан мен облыс­та, республикада басшылық қызмет атқарған қайраткерлер және өнер шеберлерінің есімдері қашалып жазылған.

Аудан әкімдігінің хабарлауынша, ҰОС ардагерлерінің қатысуымен мемориалдың ашылу салтанатын аудан жұртшылығы кең ауқымда атап өтпек. Салтанатты рәсімде ардагерлерге бағалы сыйлықтар табыс етіліп, жиын соңы мерекелік концертке ұласпақ.###