Мемлекеттік қызметке үміткер кандидаттардың біліктілігі жаңа тесттермен бағаланатын болады – Назарбаев

«100 нақты қадамды бес реформаны жүзеге асыру үшін жасақтап жатырмыз. Бұл бес реформаның әр пунктісіне байланысты. Бірінші бағыт, кәсіби автономды мемлекет аппаратын жасақтау.  Біз мемлекеттік қызметтің мансаптық  үлгісіне көшуіміз керек, мемлекеттік қызметке шыншыл, талантты, дайындалған азаматтарды алуымыз керек», - деді сөз басында Н. Назарбаев.

Елбасының айтуынша, мемлекеттік қызметке әрбір кандидаттың жеке қасиеттерін бағалау үшін жаңа сынақтар енгізіледі. Бұл тестілер мемлекеттік қызметкерлердің бірыңғай дағдыларына негізделеді. «Біз мемлекеттік қызметкерлердің кәсіби аппаратын құруға тиіспіз. Олардың жалақысы да бәсекелестік қағидатында болуы керек, яғни, бұл жұмыс нәтижесіне тәуелді болады. Шамамен олардың жалақысы жеке сектордың 70 пайызына жуықтауы мүмкін. Алайда, бұған қосылатын үстемеақыларды әрбір органдар өз ішінен табуы керек», - деді Мемлекет басшысы.

«Біз министрлер мен ведомство басшыларына бюджет мәселесін  өздері шешуге мүмкіндік жасаймыз. Егер үш адам атқаратын жұмысты бір адам істей алса, әрине онда жалақыны қалдырамыз, жетпегенін қосамыз», - деп толықтырды Н. Назарбаев.

Индира Кауметова