Щучинскіде «жасыл» экономиканы дамыту бойынша халықаралық конференция өтті

11 Қазан, 2013 16:30

9-10 қазан күндері Щучинск қаласында ҚР қоршаған ортаны қорғау министрлігінің Қазақ орман шаруашылығы ғылыми-зерттеу институты және Қазақстанның биоалуантүрлілігін сақтау корпоративтік қорымен бірлесіп ұйымдастырылған «жасыл» экономиканың дамуы және биологиялық алуантүрлілікті сақтау жөніндегі Халықаралық ғылыми-практикалық конференция өтті, деп Қоршаған ортаны қорғау министрлігінің баспасөз қызметі хабарлады.

«Конференцияда Қазақстанның «жасыл» экономикаға көшуі аясында орман қорларын сақтау тиімділігін жоғарылату, ормансыздануды бақылауды күшейту, елде орман шаруашылығын басқарудың заманауи әдістерін енгізу және дағдыларды дамыту мәселелері талқыланды», - деп хабарлады ведомство.

Конференция жұмысына Қоршаған ортаны қорғау министрлігінің, жергілікті атқарушы органдардың өкілдері, Беларусь, Қазақстан, Ресей және Өзбекстанның орман өсіруші ғалымдары, табиғатты және орманды қорғау мекемелерінің мамандары, сондай-ақ, орман шаруашылығы мамандарын даярлайтын ЖОО мен колледждерінің профессорлары мен оқытушылары қатынасады.

Республика аумағы ормандылығының төмендігіне байланысты (4,6%), қаралған мәселелер Қазақстанның орман саласы үшін аса маңызды болып отыр. Осы орайда мемлекет аумағын экологиялық сауықтыру жұмыстарын жандандыру шеңберіндегі секторды дамытудың басым бағыттарының бірі – орманды қалпына келтіру болып табылатындығын айта кету керек.

Елімізде ерекше қорғалатын табиғат аумақтарының жалпы ауданы 23,1 млн.га. (ел аумағының 8,5%) құрайды. 2020 жылға дейін бұл аумақ 27 млн. га дейін, немесе Қазақстан аумағының 10% құрайтындай жағдайға жеткізіледі.

Конференция негізгі проблемалық мәселелерді шешу бойынша ұсыныстар енгізілген қарар қабылдады.