Тараздағы «ЕХРО - 2017 – жастар көзімен» инновациялық шарасына 20 жоба ұсынылды

Облыстың ішкі саясат басқармасы хабарлағандай, «Жасыл экономикаға» көшу бағытындағы қарышты қадамдарының бірі және дәстүрлі емес энергия көздері» тақырыбына арналған инновациялық жобалардың    «EXPO-2017 – жастар көзімен» атты көрмесіне іріктеу кезеңі өткен болатын. Аталған көрменің бірінші іріктеу кезеңінде облыстағы  ірі кәсіпорындардан, жоғары және орта арнаулы оқу орындарынан, орта мектептердегі жас ғалымдардан 35 жоба келіп түсіп, арнайы құрылған сараптамалық комиссияның іріктеуінен ақтық кезеңге 23 жоба жолдама алды.

Байқауға «Үздік көрме экспонаты» («жасыл экономика» және дәстүрлі емес энергия көздері тақырыбы бойынша), «Үздік инновациялық жоба» аталымдары бойынша 14 пен 35 жасқа дейінгі жас ғалымдары қатысып, көрме барысында «Заманауи компрессор және мұнай айдау бекеттері», «Жел энергетикалық қондырғы», «Қол жетімді дайын баспана», «Өсімдік қалдықтарынан биоэтанол өндіру», «Ауылдық жерлерде альтернативті энергия көздерін қолдану», «Ион» аппаратын жасау», «Күннің энергиясын пайдалана отырып жылыжайда банан өсіру», «Тұрғын үй ғимараттарының электр тартылымдары мен жарықтандырылуы», «Қант диабетімен ауыратын науқастарға арналған ортопедтік өнімдер және жайлы аяқ киім жасау», «Дала жағдайында өрт сөндіруге арналған роторлы топырақ лақтырғыш машина», «Ауыл шаруашылығы қалдықтарынан биогаз өндіруге арналған жерасты энергия үнемдеуші биоэнергетикалық кешен», «Лас суларды тазалауға арналған фильтрациклон», «Күн энергиясы және пирамиданың қасиеттері» жобалары қорғалды.

Қатысушылардың жұмыстары жобаның өзектілігі, бірегейлігі, ғылыми жаңалығы,  практикалық мәнділігі және автордың қосқан жеке үлесі критерийлері бойынша бағаланды.