• Басты
  • Тәуелсіз Қазақстанның барлық табыстары мен жетістіктеріне еліміздегі бейбітшілік пен келісімнің арқасында қол жеткіздік – Қ.Мәми (Фото)

Тәуелсіз Қазақстанның барлық табыстары мен жетістіктеріне еліміздегі бейбітшілік пен келісімнің арқасында қол жеткіздік – Қ.Мәми (Фото)

1 Мамыр, 2015 10:31
Жоғарғы Сотта 1 мамыр – Қазақстан халқының бірлігі күнін мерекелеуге арналған салтанатты жиын болып өтті.

Ведомство хабарлағандай, салтанатты шараға қонақ ретінде Қазақстан халқы Ассамблеясы Төрағасының орынбасары – Хатшылық меңгерушісі Ералы Тоғжанов, Конституциялық Кеңестің Төрағасы Игорь Рогов, Қазақстан халқы Ассамблеясынан Парламент Мәжілісіне сайланған депутаттар шақырылды.

Жиынның алдында Жоғарғы Сот Аппаратының қызметкерлері қатысқан Қазақстан халқы достығының фестивалі ұйымдастырылды. Фестиваль шеңберінде Аппараттың әрбір құрылымдық бөлімшесі Қазақстанда тұратын белгілі-бір этностың мәдениетін, салт-дәстүрін, музыкасы мен ұлттық тағамдарын көрсетті.  

Салтанатты жиынды ашқан Қ. Мәми қазақстандықтар үшін 1 мамыр мерекесінің маңыздылығына тоқталып, Қазақстан халқының бірлігін сақтау мен нығайтуда Мемлекет басшысының рөлі айрықша екенін атап өтті.

 «Тәуелсіз Қазақстанның барлық табыстары мен жетістіктеріне көп жағдайда еліміздегі бейбітшілік пен келісімнің арқасында қол жеткіздік. Бүгінде республикамыздағы соттарда 28 этнос өкілдері жемісті қызмет атқаруда. Соттар тарапынан жыл сайын бір миллионнан астам істің қаралуы, халық сенімінің арта түсуі қазақстандық сот төрелігінің тиімді көрсеткіші болып саналады», - деді өз сөзінде Жоғарғы Сот Төрағасы.  

Жоғарғы Сот Төрағасының Өкімімен Қазақстан халқының бірлігі күніне орай және Ұлы Отан соғысындағы Жеңістің 70 жылдығы қарсаңында республикадағы 70-ке жуық судья, Ұлы Отан соғысының ардагерлері, тыл еңбеккерлері мен отставкадағы судьялар ведомстволық медальдармен және арнайы төсбелгілермен марапатталды. Аталған наградалар өңірлерге жіберілді және марапат иелеріне салтанатты түрде тапсырылатын болады.    

Барлық жаңалықтар