Қазақстанда - ҚР Президентін сайлау күні
26 Сәуір, 2015 07:02
Астана уақыты бойынша таңғы сағат 7.00 Қазақстанның басым бөлігінде ҚР Президентінің кезектен тыс сайлауында дауыс беру үшін сайлау учаскелері ашылды.
Қазақстанның сайлаушылары үш кандидаттың бірін таңдайды: ҚКХП атынан кандидат Тұрғын Сыздықов, өзін-өзі ұсынушы Әбілғазы Құсайынов және Мемлекет басшысы Нұрсұлтан Назарбаев.
2015 жылдың 25 ақпанында ҚР Президенті Нұрсұлтан Назарбаев «Қазақстан Республикасы Президентінің кезектен тыс сайлауын тағайындау туралы» № 1018 Жарлыққа қол қойды. Аталмыш құжатқа сәйкес, президенттік сайлау 2015 жылдың 26 сәуірінде өту керек.
ҚР ОСК мәліметі бойынша, 2015 жылдың 10 сәуіріндегі жағдай бойынша елімізде дауыс беруге құқығы бар 9 млн 514 мың 988 сайлаушы бар.
Бұдан басқа, алдағы сайлау барысын шет мемлекеттің 1 мың 26-дан астам байқаушысы, халықаралық ұйымдар мен шетелдік БАҚ өкілдері бақылайтын болады.
