Алматыдағы 130 үйдің тұрғындары ТКШ модернизациялау бағдарламасына өтініш берді

«Бүгінге дейін 130 көппәтерлі үйдің тұрғындарынан жалпы құны 1 625 млн теңгеге өтініштер келіп түсті. Күтіліп отырған бюджеттік қаржыландыру 2013 жылдың өзінде 28 үйді күрделі және ағымдағы жөндеуден өткізуге, 4 блоктық жылу бекетін орнатуға, 150 лифт кешенін орнатуға мүмкіндік береді», - делінген хабарламада.

Мемлекеттік бағдарлама аясында жалпы мүліктік жөндеу қызметтері ешбір пайыздық өсімсіз, индекстеусіз  және ішкі факторлардан тәуелсіз бөліп төлеу арқылы көрсетіледі.

Халықтан жиналған қаражат басқа үйлерді де жөндеуден өткізуге қолданылады. 2013 жылы қайтарылған қаржыға Панфилов көшесі, 80-үйге 3 жаңа лифт, 2 жылу бекеті алынған. Ақсай-2 ықшам ауданындағы 68 А үйіне лифт алуға келісім жасалған.

Тұрғындар үшін жөнделген пәтерлердің құнының өсуі қосымша бонус болып табылады. Үйлердің алды бірдей болып жаңартылып, жаңадан балалар ойнау алаңы мен аулалар пәтер құнының орташа есеппен 10-15 пайызға өсірген.