Алматыда III Орта-Азиялық Сауда Форумы өтіп жатыр

10 Қазан, 2013 12:45

Кеше, 9 қазанда Алматыда III Орта-Азиялық Сауда Форумы өз жұмысын бастады. Бағдарламада Орта Азияның кәсіпкерлерімен Business-to-Business іскерлік кездесуі де қамтылған, деп хабарлады Қазақстан баспасөз клубындағы брифингте форум ұйымдастырушылары.

«Өткен жылғы Қазақстанның экспортқа шығарған 92 млрд долларлық тауарының тек 3 млрд доллары ғана Орталық Азияға тиесілі. Орталық Азиямен әрекеттестіктің төмендігі өзге күшті мемлекеттер саясатының әсерінде қалуынан болып отыр. Жағдайды реттеу үшін осы тектес кездесулер ұйымдастырылып, аймақтағы елдердің тікелей араласуына жағдай жасалуда», - деп мәлімдеді «KAZNEX INVEST» экспорт және инвестиция бойынша ұлттық агенттік» АҚ басқарушы директоры Ғазиза Шаханова.

Сонымен қатар, Орталық Азияның экспорттық әлеуеті төмен, алайда аймақтың экспорттау мүмкіндігінде оң нәтижелер байқалады. «Иранға тартылған транскаспий темір жолы мұның жарқын мысалы. Оның Ауғанстанға бағытталған тармағы бұл елдермен сауда қатынасын нығайтуға мүмкіндік береді. Бұл жағдай сауда кедергілерінің уақыт өте келе азайып бара жатқанының көрінісі», - деді форум ұйымдастырушылары.

Халық тұтыну тауарлары экспортынан басқа туризм мен фармацевтика саласы да даму үстінде. Ғазиза Шаханованың айтуынша, бұл бағыттар «KAZNEX INVEST» жұмысының басым бағыттарының бірі болып табылады.

Барлық жаңалықтар