Президенттің арнайы елшісі Перу мен Бразилияға сапары барысында БҰҰ ҚК ҚР кандидатурасын қолдау ұсынылды – СІМ

21 Сәуір, 2015 18:41

17-сәуір күні Парламент Сенатының комитет төрайымы Бірғаным Әйтімова Мемлекет басшысының арнайы елшісі ретінде 2017-2018 жылдары БҰҰ ҚК тұрақты емес мүшесі ретінде Қазақстанның кандидатрасын ұсыну мен мемлекеттердің екіжақты ынтымақтастығының жағдайы мен оның болашағын талқылау мақсатында Перу Республикасына барды.

Лимуға сапары барысында Б.Әйтімова Перу Республикасының Сыртқы байланыс вице-министрі Клаудио Пуэнто Рибейромен және осы елдің Көпжақты ынтымақтастық пен халықаралық ұйымдар департаментінің директоры Давид Малага Эго-Агиероның кездесуі өтті, деп хабарлайды еліміздң Сыртқы істер министрлігі.

Әңгіме басында Б.Әйтімова вице-министрге Қазақстан Президенті Нұрсұлтан Назарбаевтың Перу Республикасының Президенті Ольянта Умалаға жолдаған екіжақты ынтымақтастықты одан әрі арттыру мен 2017-2018 жылдары БҰҰ ҚК тұрақты емес мүшелігіне Қазақстанның кандидатурасынның ұсынылуын қолдау жөніндегі жолдауын жеткізді.

Тараптар түрлі салалар бойынша екіжақты қарым-қатынастарды дамытудың перспективаларын сөз етті. Б.Әйтімова перуандық дипломатты басымдықтарының бірі жаһандық ядролық қауіпсіздікті нығайту болып табылатын Қазақстанның сыртқы саясаттағы бағытынан хабардар етті. Сондай-ақ ол сөзінде Қазақстан Президенті Нұрсұлтан Назарбаевтың адамзат баласын жаппай қырып-жою қаруынан азат ету жөніндегі маңызды бастамалары жөнінде жан-жақты әңгімелеп, әсіресе АТОМ жобасы жөнінде тарқата айтып берді.

К.Рибейро Қазақстанның ядролық қарудан ада бейбітшілікті құру жолындағы бастамасын жоғары бағалады. Ол Қазақстан мен Перу арасында ортақ құндылықтардың көп екендігін, сондай-ақ ядролық қауіпсіздік мәселесін қоса алғанда адамзат баласының алдында тұрған қауіптерді шешу бойынша да көзқарастарының ұқсас екендігін мәлім етті.

Қазақстанның қазіргі инвестициялық мүмкіндіктері Д.Малага Эго-Агиеромен талқыланды. «Тараптар екі елдің сауда-экономикалық әлеуетінің мықты екендігін атап өтті. Перу компанияларының Астанада өтетін «ЭКСПО-2017» көрмесіне қатысу мәселелері жан-жақты талқыланды. Перу тарапы Қазақстанның қазіргі әлемуеттік-экономикалық жағдайынан хабардар етіліп, Қазақстан Президенті Нұрсұлтан Назарбаевтың Қазақстан халқына жолдаған «Нұрлы жол – Болашаққа бастар жол» жолдауының негізгі бағыттары да таныстырылды»,-делінген хабарламада.

Нақтырақ айтқанда, Мемлекет басшысының мемлекеттің қоғамдық-саяси, әлеуметтік-экономикалық өмірін алдағы уақытта трансформациялауға бағытталған 5 институционалды реформасының негізгі бағыттары түсіндірілді.

Осыған дейін Бірғаным Әйтімова жұмыс сапарымен Бразилия Федеративті Республикасында болып, осы елдің вице-президенті Мишель Темермен кездесіп, Қазақстан Президентінің Бразилия басшысы Д.Руссефке жолдаған еікжақты ынтымақтастықты дамыту мен 2017-2018 жылдары БҰҰ ҚК тұрақты емес мүше ретінде Қазақстанның кандидатурасын қолдау жөніндегі жолдауын жеткізді.

Кездесу барысында саяси және экономика салалары бойынша екіжақты қарым-қатынастардың перспективалары сөз болды. Тараптар екі елдің мүмкіндіктерін пайдалана отырып, екіжақты сауда және инвестициялық ынтымақтастықты дамыту қажеттігін айтты.

Бразилия тарапы Қазақстанның қазіргі инвестициялық мүмкіндіктерімен таныстырылып, Астанада өтетін ЭКСПО-2017 көрмесіне шақырылды.