• Басты
  • Қазақстанда базалық зейнетақының бағамын 2017 жылы 1,7 есеге арттыру жоспарланып отыр – ДСӘДМ

Қазақстанда базалық зейнетақының бағамын 2017 жылы 1,7 есеге арттыру жоспарланып отыр – ДСӘДМ

20 Сәуір, 2015 17:26
Қазақстанда базалық зейнетақының орташа мөлшері 2017 жылы 1,7 есеге артатын болады, деді Денсаулық сақтау және әлеуметтік даму министрінің орынбасары Светлана Жақыпова Мәжілісте өткен «Қазақстан Республикасының кейбір заңнамалық актілеріне зейнетақылық қамтамасыз ету мәселелері бойынша өзгерістер мен толықтырулар енгізу туралы» заң жобасының таныстырылымында.

«Базалық зейнетақыны белгілеу саясатының 2017 жылдың 1-шілдесінен бастап, өзгеруіне байланысты барлық зейнет жасына шыққан зейнеткерлер үшін зейнетақыны белгілеудің тетігі де өзгереді. Осылайша, зейнетақы алатын азаматтардың 37 пайызы үшін олардың көлемі өмір сүрудің ең төменгі көрсеткішінің 100 пайызына дейін көтеріледі. Бұл дегеніңіз базалық зейнетақы 1,7 есеге артады деген сөз»,-деді С.Жақыпова.  

Вице-министрдің сөзінше, бұл мақсатқа республикалық бюджеттен 2017 жылы қосымша 137,4 миллиард теңге бөлінеді.  

«Мұндай шара үлкен жұмыс өтілі бар, алайда төмен зейнетақы алатын зейнеткерлердің мәселелерін шешуге, зейнетақының мөлшерін анықтауға, зейнетақы жүйесіне қатысуға ынталандыруға мүмкіндік береді»,-деді министрдің орынбасары.  

Бұған қоса жұмыс берушінің азаматтарды зейнетақымен қамтамасыз ету рөлін нығайту мақсатында  2018 жылдың 1-қаңтарынан бастап, жұмыс берушілерге 5 пайыз көлеміндегі міндетті зейнетақылық жарналарды енгізу арқылы жаңа шартты-жинақтау жүйесін іске қосу көзделіп отыр.    

Осылайша, жұмысшылар зейнеттік жасқа келгенде және оның еңбек өтілі 5 жылдан кем емес болғанда, зейнетақылық шартты-жинақтау жүйесіне қатысу мөлшері шартты зейнетақылық есебі мен өмір сүру ұзақтығына,   зейнеталық міндеттемелерге байланысты болады.   

Камила Амирова

Барлық жаңалықтар