Мерзімді әскери қызметке 50-ден аса солтүстік қазақстандық шақырылды

20 Сәуір, 2015 12:13

Петропавловск қаласында Солтүстік Қазақстан облысының қорғаныс істері жөніндегі департаменті әскер қатарына шақырылғандарды салтанатты шығарып салу рәсімін өткізді, деп хабарлады Қорғаныс министрлігі.

Солтүстік Қазақстан облысынан мерзімді әскери қызметке 50-ден аса жасөспірім шақырылды. Олардың барлығы ҚР Ұлттық қауіпсіздік комитеті Шекара қызметінің қатарында әскери борышын өтемек. Әскери бөлімдерге келгеннен бастап командирлер жас буынды әскери ант қабылдауға даярлайды.

Әскерге шақырылушылардың көбі армия қызметіне үлкен мақсатпен бара жатқанын, әскери істің қыр-сырын үйренгісі келетінін айтты. Сонымен қатар қазірдің өзінде жастар келісімшарт бойынша әскери қызметке қалуға ниет білдіріп отыр. Осы орайда әскери қызметке шақырылғандарды сапалы іріктеу үшін дене және әскери даярлығына, жас буынның білімі, мамандығы, психологиялық жай-күйі мен моральді-іскерлік қасиеттеріне ерекше көңіл бөлінеді.

Естеріңізге сала кетейік, қазақстандық армияның қатарын көктемгі науқан кезінде әскерге шақыруды кейінге қалдыруға және босатылуға құқығы жоқ 15 мыңнан аса әскер жасындағы жас жігіттер толықтырады. Жалпы биыл мерзімді әскери қызметке 30 мың қазақстандықты шақыру жоспарланып отыр.

Барлық жаңалықтар