ИИДМБ: СҚО 2015 жылы Индустрияландыру картасы бойынша 29 жобаны жүзеге асыру көзделіп отыр

Аймақ әкімдігі өкілдерінің мәліметтерінше, Индустрияландыру картасының алғашқы бесжылдығында 32 жоба жүзеге асырылып, 1 мың 500 жұмыс орындары ашылған.

«Екінші бесжылдыққа 29 жобаны жүзеге асыру жоспарланып отыр, оның 15-і биыл іске қосылып, 550 жұмыс орнын ашуға мүмкіндік береді. Ал өндірілген өнім көлемі 11,5 миллиард теңгеге жетеді. Бұған қоса тағы құны 17 миллиард теңге болатын 21 жоба аяғына дейін жеткізілетін болады»,-делінген хабарламада.

Аймақ басшысы Ерік Сұлтанов «Атамекен» ұлттық кәсіпкерлер палатасының Төралқа төрағасы Тимур Құлыбаевтың қатысуымен өткен Солтүстік Қазақстан облысының Кәсіпкерлер палатасының кеңейтілген отырысында ауыл шаруашылығын дамытып, оның өнімдерін қайта өңдеу облысты өзінің азық-түліктерімен қамтамасыз етудің кепілі болатындығын атап өтті. Сонымен қатар ол облыста ауыл шаруашылығы өнімдерін қайта өңдеуді жүзеге асыратын кешенді бағдарлама туралы айтып берді.  

Облыс әкімінің сөзінше, жергілікті тауар өндірушілерге «Қазақстанда жасалған» имиджтік науқаны арқылы қолдау көрсетілуде. Аталмыш акцияны 2 мың 300 сауда нысандары қолдап, өздерінде қазақстандық өнімдердің бөлімдерін ұйымдастырды.  

«Біздің ұлттық палатамен ынтымақтастығымыз аймақтағы кәсіпкерліктің дамуына серпін беріп, Мемлекет басшысы алдыға қойған міндеттердің сәтті жүзеге асуының кепілі болады»,-деді СҚО әкімі.