Алматыда Жеңістің 70 жылдығы қарсаңында ардагерлер мен тыл еңбеккерлеріне мерейтойлық медалдар табыс етілді (ФОТО)

Ардагерлерді марапаттау рәсіміне Алматыдағы орта және жоғары оқу орындарының студенттері, профессор-оқытушылар құрамы және Радиоэлектроника және байланыс әскери-инженерлік институтының курсанттары қатысты, деп хабарлады ҚР ҚМ.   

Шара қатысушылары қан майданда қаза болған жауынгерлерді еске алып, бір минут үнсіздік жариялады. Радиоэлектроника және байланыс әскери-инженерлік институтының бастығы полковник Қайрат Садықов ардагерлердің жастарды әскери-патриоттық тәрбиелеу ісінде маңызды рөл атқаратындығын атады. «Аталарымыздың жауынгерлік ерлігі Қазақстан Республикасы Қарулы Күштерінің болашақ офицерлері мен Отан қорғаушылар үшін жарқын үлгі-өнеге болып табылады», - деп атап өтті.

Іс-шараға арнайы шақырылған ардагерлер қатысушыларға тілек-лебіздерін арнады. Ұлы Отан соғысының бар ауыртпашылығын естеріне ала отырып, Тәуелсіз Қазақстанның одан әрі гүлденуін және ашық аспан астында бейбіт өмір кешу бақытын тіледі.

Алматы қаласы Әуезов ауданында тұратын ардагерлер: Рыжов Евгенийге, Тұрарұлы Байтүмеге, Мозговой Петрге, Керімқұлов Жаңбырға, Иванов Николайға, Асқарбаев Жаркөжеге, Дубовский Семенге, Садыбекова Аманатқа, Цыкунов Василийге, Әбдірахова Василияға, Репин Леонидке, Байсалбай Қайысбекке, Тюрин Михаилге, Қасболат Шолпанқұлға, Киль Самуилге және Савельев Михаилге «Ұлы Отан соғысындағы Жеңістің 70 жылдығы» мерейтойлық медалдары табыс етілді.

Салтанатты рәсімнен кейін қонақтарға соғыс жылдарынан көріністер көрсетіліп, әскери әндер шырқалды. Сонымен қатар Ұлы Отан соғысындағы қазақстандықтардың жауынгерлік ерліктері туралы бейне таспалар көрсетілді. Іс-шара соңында ардагерлерге арналып дәстүрлі сарбаз ботқасы қойылған мерекелік дастархан жайылды.