• Басты
  • 20 мыңнан астам ауыл тұрғыны «ЖҚЖК 2020» бағдарламасына қатысуға ниет білдірді

20 мыңнан астам ауыл тұрғыны «ЖҚЖК 2020» бағдарламасына қатысуға ниет білдірді

20 Сәуір, 2015 08:36
ҚР Денсаулық сақтау және әлеуметтік даму министрлігінің «Жұмыспен қамту жол картасы 2020» бағдарламасын түсіндіру жөніндегі мобильдік топтарының биылғы 16 наурыз бен 17 сәуір аралығындағы жұмысы нәтижесінде 20169 адам «Жұмыспен қамту жол картасы 2020» және «Өрлеу» жобасына қатысуға ниет білдірді. 4343 қазақстандық – «Жұмыспен қамту жол картасы 2020» бағдарламасының, 362 азамат – «Өрлеу» жобасының қатысушысы болды.

«Жалпы аталған мерзімде 188 аудан (453 кент) қамтылды. «Жұмыспен қамту жол картасы 2020» бағдарламасына қатысуға азаматтар ең көп ниет білдірген Оңтүстік Қазақстан облысында өтініш білдірген 6982 адамның 2218-і қатысушы болды. Алматы облысында 1743 азаматтың 465-і, Маңғыстау облысында – 1122, Шығыс Қазақстан облысында – 970, Астана қаласында – 635 адам бағдарламаға қатысушы болды», - делінген ведомствоның хабарламасында.  

Кейбір өңірлерде кенттерді қамту көлемі жоспардан аса орындалды. Айталық, Оңтүстік Қазақстан облысында мобильдік топтар қосымша 4 ауылды, Маңғыстау облысында – 49, Шығыс Қазақстан облысында – 51, Атырау облысында – 20, Қарағанды облысында – 49, Павлодар облысында – 27 ауылды аралады.    

«Өрлеу» бағдарламасына қатысуға ниет білдіргендер саны ең көп болған Шығыс Қазақстан облысында 4460 азаматтың 208-і қатысушыға айналды. 

Бұған дейін хабарланғандай, жалпы Қазақстан бойынша құрамына 441 қызметкер енген 178 мобильдік топ құрылды. Алғашында жұмыссыздық деңгейі жоғары, өздерін нәтижесіз жұмыспен қамтығандар және тұрмысы төмен тұрғындары көп, сондай-ақ, «Жұмыспен қамту жол картасы 2020» бағдарламасына қатысу деңгейі төмен 181 ауданның 404 ауылын қамту жоспарланды. Мобильдік топтардың жұмысы 2015 жылдың соңына дейін жалғасады.  

Барлық жаңалықтар