• Басты
  • Астанада Чанакалледе өткен соғыс туралы суреттердің теңдесі жоқ көрмесі өтті (ФОТО)

Астанада Чанакалледе өткен соғыс туралы суреттердің теңдесі жоқ көрмесі өтті (ФОТО)

17 Сәуір, 2015 19:28
«Астана» ұлттық картина галереясында тарихи оқиға - Чанакалле маңындағы серілер соғысының аяқталғанына 100 жыл толуына орай көрме өтті.

«Әр халықтың тарихында Ұлы батырлар болған. Чанакалле маңында болған соғыс Түркия үшін үлкен сілкініс болды. Түркия бұл соғыста үлкен қарсылық көрсетіп, халқымыз жүздеген жылдар бойы оны есте сақтап келеді. Сол себепті біз бүгін сол қиын-қыстау  кезеңдерде соғыс тауқыметін шеккен азаматтардың  қайғы-қасіретін еске салғымыз келіп отыр»,-деді Юнус Эмре атындағы институт  жетекшісі Хайати Девели.

Оның айтуынша, бұл көрме сол жылдардағы сұрапыл соғыстың тек кейбір сәттерін ғана бейнелейді.

«Фотосуреттер тікелей әскери мұрағаттан алынған, расын айтқанда мұндағы суреттердің кейбірін біздің өзіміз де алғаш рет көріп отырмыз. Осы суреттерді қалың көпшіліктің назарына ұсына отырып, Қазақстанмен арамызда достық, жылы қарым-қатынас орнықса екен дейміз. Біз өткенді еске ала отырып, бүгінгі таңда достық пен бірлікте өмір сүрудің қаншалықты маңызды екендігін жақсы түсінеміз»,-деді Хайата Девелли.

Чанакалле Чанакалле шығанағына кіретін жолда орналасқан түріктердің қаласы. Чанакалленің негізі XV ғасырда қаланған және ол Осман бекінісі болатын. XVIII ғасырларда аталмыш аймақ қарқынды дамыды. Бірінші дүниежүзілік соғыс кезінде Чанакалла аймағында Дарданель операциясымен байланысты оқиғалар орын алып жатты.

Дарданель -  Бірінші дүниежүзілік соғыс кезінде Уинстон Черчильдің бастамасымен Антанта елдері тарапынан ұйымдастырылған кең көлемді әскери операция. Оның мақсаты Түркияның астанасы Константинопольды және Ресейге апаратын ашық теңіз жолын басып алу болатын.   

Бір жылға жуық уақытқа созылған Дарданель операциясы Бірінші дүниежүзілік соғыстың маңызды кезеңі болатын. Алайда ол осы операцияны ұйымдастырушы Британия, Франция мен олардың одақтастарына өздері ойлағандай нәтиже бермеді. Өйткені түрік әскерлері оларға табанды қарсылық көрсетті. Бұл шешуші ұрыс еді, нәтижесінде Түркия аймағынан шетелдіктер қуып шығарылды.   

Өз кезегінде көрменің ресми ашылуынан соң қонақтарға Чанакалле туралы қысқаметражды кино көрсетіліп, қонақтар арасында лотерея ойыны ойнатылды. Ондағы басты сыйлық екі адамға Чанакалле аймағында демалып келуге берілетін туристік жолдама болатын. Яғни жолдаманы ұтып алған адам Түркиядағы әйгілі соғыс өткен тарихи оқиға болған орынды көріп қайтады.   

Индира Кауметова

Фото Азамат Алиев

Барлық жаңалықтар