ҚР ОСК төрағасы С.Тұрғанқұлов ЕҚЫҰ/ДИАҚБ Миссиясының басшысымен кездесті

17 Сәуір, 2015 15:26

Қазақстан Республикасы Орталық сайлау комиссиясының Төрағасы Қ. Тұрғанқұлов Қазақстан Республикасы Президентінің кезектен тыс сайлауын байқау жөніндегі ЕҚЫҰ/ДИАҚБ Миссиясының басшысы Корнелия Виллемиен Анке Йонкер ханыммен кездесті, деп хабарлады ОСК баспасөз қызметі.

Кездесуге сондай-ақ, ЕҚЫҰ/ДИАҚБ Миссиясы Басшысының орынбасары Меган МакКейб Фитцжеральд, Ортсайлауком Төрағасының орынбасары В.К. Фоос, Ортсайлауком хатшысы Б.С. Мелдешов, ҚР ОСК мүшелері Т.В. Охлопкова, М.А. Сәрсембаев және ЕҚЫҰ/ДИАҚБ Миссиясының құқықтық мәселелер жөніндегі маманы Мерсе Кастеллс Висенте мен сайлау мәселелері жөніндегі маманы Лусиан Рауль Мурешан қатысты.

Ортсайлауком басшысы Йонкер ханымды Қазақстан Республикасы Президентінің кезектен тыс сайлауында дауыс беру күніне дайындық жөніндегі жұмысымен таныстырды, сондай-ақ ҚР ОСК мен жалпы сайлау органдарының ағымдағы қызметі туралы айтып берді.

«Осы уақытта дауыс беру күніне белсенді дайындық жүріп жатыр. Сонымен қатар біз кандидаттардың БАҚ-тарға тең қол жеткізуін бақылауды жүзеге асырудамыз, сайлау заңнамасының нормаларын бұзушылықтарға жол бермеу мақсатында бұқаралық ақпарат құралдарына мониторинг жүргізудеміз. Сонымен қатар біз сайлауды ұйымдастырушылар мен сайлау процесіне қатысушыларды оқыту, сондай-ақ сайлаушылар тізімдерін жаңарту және түзету жөнінде жұмысты жалғастырудамыз», - деп атап өтті Қ. Тұрғанқұлов.

ЕҚЫҰ/ДИАҚБ Миссиясының басшысы өз кезегінде ұйымдастырылған кездесу, сондай-ақ ҚР ОСК тарапынан көмек пен ынтымақтастық үшін ризашылығын білдірді, Миссия сарапшыларының жұмысы туралы айтып, Ортсайлауком Төрағасын Миссияның аралық есеп дайындағаны туралы ақпараттандырды.

Сонымен қатар Йонкер ханым сайлаушылар тізімдерін жаңарту жөніндегі жұмыстың күрделілігі мен маңыздылығын атап өтті.

«Біздің мақсатымыз – әрбір сайлаушының сайлау құқығын іске асыру мүмкіндігін қамтамасыз ету. Ол үшін біз барлық қажетті қадамдардың алдын алудамыз: сайлау комиссияларының ХҚО-мен өзара іс-әрекеттерінің жаңа тетіктерін енгізудеміз, сайлаушылар өздерін сайлаушылар тізімдерінен нақтылау процесіне белсенді қатысуға шақырамыз және т.б. Жергілікті атқарушы органдар өңірлерде арнайы Call-орталықтарын ашуда. Осы сәтте жалпы республика бойынша олардың саны 423» - деді Қ. Тұрғанқұлов.

Кездесу барысында сондай-ақ сайлау комиссияларын қалыптастыру тәртібімен, лингвистикалық комиссия жұмысымен, сайлау учаскелерінде дауыстарды санау және сайлау қорытындыларын шығарумен байланысты мәселелер талқыланды.

Кездесу соңында Қ. Тұрғанқұлов ЕҚЫҰ/ДИАҚБ Миссиясының сарапшыларына сайлауды байқауда табыс тіледі.