Қ.Жақыпов: Халықаралық бақылаушылардың қатысуы сайлаудың маңызын арттырып, сенімді жоғарылатады

17 Сәуір, 2015 15:21

Палата Төрағасы Қабиболла Жақыпов бастаған мәжілісмендер Санкт-Петерборда ТМД Парламентаралық Ассамблеясы шараларына қатысты, деп хабарлады Мәжілістің баспасөз қызметі.

« ТМД ПАА Кеңесі жиынының күн тәртібінде қаралған мәселенің бірі – 2015 жылы 26 сәуірде өтетін Қазақстан Республикасы Президенті сайлауына халықаралық бақылаушы ретінде ТМД ПАА өкілдігін жіберу туралы», - делінген хабарламада.

Мәжіліс Спикерінің пікірінше, халықаралық бақылаушылардың болуы сайлаудың мән-маңызын арттырып, сенімді жоғарылатады және ашықтық пен жариялылықты қамтамасыз етуге ықпал етеді. ТМД ПАА 42-пленарлық отырысында Достастық елдері парламенттері технологиялық терроризмге қарсы іс-қимыл, шекаралық қауіпсіздік, денсаулық қорғау саласы, еріктілік, аудиторлық қызмет, туристік салалардағы модельдік заңнамаларға қатысты өзекті сұрақтарды талқылады.

Әсіресе, Ұлы Отан Соғысы Жеңісінің 70 жылдық мерейтойына орай арнайы әзірленген «Отан қорғау кезінде қаза болғандарды мәңгі есте қалдыру туралы» және « Патриоттық тәрбие беру туралы» сынды модельдік заңдарға айрықша көңіл бөлінді.

Барлық жаңалықтар