ҚР Мемлекеттік хатшысы Қазақстан мен ЭЫДҰ арасындағы екіжақты ынтымақтастықтың белсенділігін атап өтті

16 Сәуір, 2015 16:11

Қазақстан Республикасының Мемлекеттік хатшысы Гүлшара Әбдіқалықова Экономикалық ынтымақтастық және даму ұйымы (ЭЫДҰ) бас хатшысының орынбасары Мари Кивинимен және Жаһандық байланыстар хатшылығының басшысы Маркос Бонтуримен келіссөздер өткізді, деп хабарлады Ақорданың баспасөз қызметі.

Кездесуде биылғы қаңтарда Қазақстан Республикасы мен ЭЫДҰ арасында қол қойылған Серіктестіктің Елдік Бағдарламасы аясындағы жобаларды қоса барлық бағыттағы екіжақты ынтымақтастықтың серпінді дамуы атап өтілді.

Әңгімелесу барысында Қазақстанның әлеуметтік дамуы, оның ішінде денсаулық сақтау, білім, гендерлік саясат, статистикалық мәліметтер алмасу мәселелеріне ерекше назар аударылды.

Г.Әбдіқалықова «Қазақстан-2050 стратегиясының, «Нұрлы Жол» бағдарламасының және Индустриялық-инновациялық даму мемлекеттік бағдарламасының іске асырылу барысы туралы баяндады.

Мемлекеттік хатшы ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия мен ЭЫДҰ арасында ынтымақтастық туралы меморандум әзірлеуге Қазақстан тарапы мүдделілік танытатынын жеткізді.

М.Бонтури Қазақстан мен ЭЫДҰ арасындағы қызу диалогқа, атап айтсақ, делегациялар алмасу, қазақстандық өкілдерді ЕЫДҰ бейіндік органдарының жұмыстарына қатыстыру және барлық межеленген бірлескен жобаларды, оның ішінде Бәсекеге қабілеттіліктің Еуразиялық Бағдарламасына енген жобаларды тиімді іске асыруға қолдау көрсетудің маңыздылығын айтты.

Сондай-ақ ол алдағы VІІІ Астана экономикалық форумына ЭЫДҰ делегациясының басшысы ретінде қатысатынын нақтылады.