Қазақстанда ғалымдар саны 4 жылда 49 пайызға өсті –БҒМ

16 Сәуір, 2015 16:01

Қазақстанда 45 жасқа дейінгі ғалымдар саны 4 жылда 49 пайызға өсті, деді Білім және ғылым министрлігінің Ғылым комитетінің төрағасы Сансызбай Жолдасбаев Орталық коммуникациялыр қызметінде өткен баспасөз-мәслихатында.

«Оңды, жүйелі өзгерістер республика бойынша ғылыми үдерісті белсендендірді және бұл сапалық және сандық көрсеткіштерге игі ықпалын тигізді. Тұрақты өсім қалыптасты. Ғылым қызметкерлерінің саны 2009 жылғы 15 мыңнан 2014 жылғы 25,8 мыңға жетті. Яғни ғалымдардың белсенділіктері артып отыр. Биылғы жылы байқауға 6 мың ғылыми жоба келіп түсті. Бұл осыған дейінгі байқаудағылардан 2 есеге көп»,-деді С.Жолдасбаев.

Оның сөзінше, жастардың ғылымға келуі жиіледі. 35 жастың айналасындағы ғалымдар саны 4 жылда 46 пайызға артып, 9,5 мыңды құрады, ал 45 жастағы ғалымдар саны 49 пайызға артып, 14,5 мың адам болды.

Құзырлы комитет өкілінің мәліметтерінше, рейтингтік журналдарда халықаралық жарияланымдар саны артып отыр. «2014 жылы 2 мың 784 жарияланым болған, бұл 2011 жылғы көрсеткіштен 3 есеге көп. Жаңа зерттеу еңбектері мен инновациялар бойынша 1 мың 400 патент алынды»,-деді комитет төрағасы.

Барлық жаңалықтар