• Басты
  • Алматыда ҰОС қатысушыларды тұрғын үймен қамтамасыз ету мәселесі толық шешілген- А.Есімов

Алматыда ҰОС қатысушыларды тұрғын үймен қамтамасыз ету мәселесі толық шешілген- А.Есімов

16 Сәуір, 2015 18:53
Алматы әкімі Ахметжан Есімов Ұлы Отан соғысындағы Жеңістің 70 жылдығы және Қазақстан халқының Бірлігі күні қарсаңында 200 алматылыққа пәтер кілттерін тапсырды, деп хабарлады қала әкімдігі.

Соғыс ардагерлері, көпбалалы аналар, жетім балалар, өндірісте қаза болғандардың отбасылары, білім беру, денсаулық сақтау, құқық қорғау салаларының қызметкерлері мен жас жанұялар жаңа қоныс иелері атанды.

«Ұлы күн - Жеңістің 70 жылдығы жақындап қалды, осыған орай Президенттің тапсырмасы бойынша елімізде үлкен шаралар жүріп жатыр. Ескеретін жайт, бұрынғы Кеңестер Одағының құрамында болған кейбір республикаларда бұл күн атап өтілмейді. Сіздер көрсеткен қаһармандық пен өшпес ерліктеріңіздің даңқы қазақстандықтардың жадында мәңгі сақталып, ұрпақтан-ұраққа жалғаса береді», - деп атап өтті қала басшысы.

Бүгінгі жаңа қоныс иелері арасында Ұлы Отан соғысының ардагерлері де бар.

«Мемлекет басшысының арнайы өкімі қабылданып, жыл сайын соғыс ардагерлеріне қажетті барлық жағдайлар жасалуда. Осыдан бес жыл бұрын барлық алматылық ҰОС ардагерлерінің пәтер мәселесі шешілген болатын. Содан бері қарай бізге еліміздің өзге өңірлерінен келгендер бар, міне, бүгін қалған ардагерлердің тұрғын үй мәселесін толық шешіп отырмыз», - деді Ахметжан Есімов.

Қала әкімі жаңа үйге қоныстанушыларды Ұлы Отан соғысындағы Жеңістің 70 жылдығымен құттықтады және ардагерлерге ерен ерліктері үшін алғыс білдірді, оларға денсаулық пен баянды өмір тіледі.

Барлық жаңалықтар