Ауыл шаруашылығы өнімдерін өндірушілерге көктемгі дала жұмыстарына 500 млн. теңге бөлінді

«Ауыл шаруашылығын қаржылай қолдау қоры» АҚ мақта өсірумен айналысатын ауыл шаруашылығы тауар өндірушілерін несиелендіруге «Ырыс» шағын қаржы ұйымына 500 млн. теңге бөледі. 

«Бұл – Қор мен «Ырыс» ШҚҰ арасындағы төртінші келісім. 2012-2014 жылдар аралығында Қор «Ырыс» ШҚҰ-на жалпы сомасы 1,5 млрд. теңге  үш  рет қарыз берді. Шағын қаржы ұйымы бөлінген қаржыны толық игеріп, Қорға уақытылы қайтарды. Жүргізілген жұмыстың арқасында 1 865 адам несие алып, 2012 жылы – 11 665 га, 2013 жылы -11 743 га, 2014 жылы - 11 871 га жерге мақта егілді», - делінген хабарламада.

Өткен жылы Қор «Ырыс» шағын қаржы ұйымына несиелеу желісін ашып, 500 млн. теңге көлемінде 2 транш аударған болатын. Бұл қаржыға 517 түпкі қарыз алушы шағын несие алып, кесте бойынша қарызды толығымен қайтарды.

Шағын несиелер түпкі қарыз алушыларға жанар-жағар май, дән, пестицид, минералды тыңайтқыш, шаруашылық материалдар мен құрал-жабдықтар, ауыл шаруашылық техникасының қосалқы бөлшектері мен толымдаушылар, жұмыс механизмдерін сатып алуға, техника, қоймаларды жалға алу, қызметтерге төлеу, өнімді сақтау және т.б. мақсаттарға беріледі. 

Қарыз алушыларға келесі талаптар қойылады: төлем қабілеттілігі, қаржылық тұрақтылық, салық және бюджетке төленетін басқа да төлемдер бойынша екінші деңгейлі банктер мен басқа да қаржы институттары алдындағы мерзімі өткен борышкерлігінің болмауы, жағымды несиелік тарихы, т.б. Кепілдеме шағын несиенің 100 пайызын қамтуы тиіс.