Бизнестің әлеуметтік жауапкершілігін дамыту бағдарламасы аясында Ақтөбе облысында балабақша салынып, жабдықталды

9 Қазан, 2013 15:21

Кеше, 8 қазанда, Ақтөбе облысы Қобда ауданында білім саласындағы бизнестің жауапкершілігін дамыту бағдарламасы аясында демеушілік арқылы салынған балабақшаның ашылуы өтті, деп хабарлайды облыс әкімдігінің баспасөз қызметі.

«Ақтөбе облысы Қобда ауданында «Көркейе бер, туған жер!» акциясы шеңберінде Исламбек Салжанов жетекшілік ететін «Алтын қыран» компаниялар тобының демеушілігімен салынған балабақшаның ашылуы өтті», - делінген хабарламада.

Балабақшаны салуға 320 млн теңге жұмсалған. Тағы 80 млн теңге инфрақұрылым орнатуға,қондырғылар алуға, оқу құралдарына жұмсалған.

Мектепке дейінгі мекеменің барлық мұғалімдік және тәрбиешілік құрамы «Монтессори» элементімен «Даналық әліппесі», «ELokS» арнайы инновациялық әдіспен оқытудан өткен.

Облыс бойынша бизнесте әлеуметтік жауапкершілікті дамыту бағдарламасы аясында, «Көркейе бер, туған жер!» акциясына шамамен 4 мың адам қатысқан.

Акция шеңберінде балабақшалар, мектептер салынып, ауруханалар мен емханалар жөнделді. Акция жұмысы кезінде 6 млрд теңгеге жұмыс атқарылды.