Көкшетауда Қазақ хандығының құрылуына 550 жыл толуына орай дарынды жастардың фестивалі өтті (ФОТО)
Ақмола облыстық жастар саясаты жөніндегі басқарманың хабарлауынша, шараның мақсаты дарынды жастардың адами, шығармашылық және мәдени жетістіктерін сақтап, жетілдіру және жастар бойында азаматтық белсенділік пен патриотизмді қалыптастыру болып табылады.
Фестиваль өткен 3 күн ішінде 300-дан астам талантты жастар би, ән, шешендік өнер сияқты өзге де жанрлар бойынша өзара тартысқа түсті. Фестивальға 5 жоғары оқу орны мен 12 техникалық және кәсібіи білім беру ұйымдарының өкілдері қатысты. «Студент көктемі-2015» фестивалінің ақтық сайысы үздік шығармашылық ұжымдар өнер көрсеткен гала-концерт болды.
Іс-шарада сөз сөйлеген облыс әкімінің орынбасары Нұрлан Нұркенов фестивальдің барлық қатысушылары мен жеңімпаздарын құттықтады. «Мен біздің облысымызда осындай жарқын, ерекше дарынды тұлғалардың бар екендігін мақтан тұтамын. Біздің басты мақсатымыз жастар мен студенттік шығармашылық ұжымдарды қолдау, олардың энергиялары мен өздерін әрі қарай дамытуға деген құлшыныстарын сақтап қалу, олардың бойындағы дарынын шыңдап, өсуіне жол ашу»,-деді әкімнің орынбасары.
Фестивальдің әділқазылар алқасының құрамында облыстың мәдениет саласының майталмандары мен қоғам қайраткерлері бар. Фестивальдің барлық жеңімпаздары мен дипломдармен, естелік мүсіндермен және құнды сыйлықтармен марапатталды.
