Астанада инклюзивті білім беруді дамытуды қолдау мақсатында қайрымдылық шарасы ұйымдастырылды (ФОТО)

15 Сәуір, 2015 19:01

Бүгін «Астана» ұлттық картина галереясында «Ашық Әлем» қоғамдық қорымен бірлескен түрде Астана қаласының білім беру басқармасы мен Білім және ғылым министрлігінің қолдауымен Қазақстандағы ерекше білім беруді қажет ететін балаларға инклюзивті білім беруді дамытуды қолдау мақсатында қайрымдылық шара өтті.

«Біз ұйымдастырған көрменің мақсаты қалың көпшіліктің назарын Қазақстандағы аутикалық бұзылу түрінен зардап шегетін балаларға инклюзивті білім беруге аудару. Яғни біз «Барлау Өндіру Қазмұнайгаз» акционерлік қоғамының қаржылық қолдауы арқылы Астанада № 23 мектептен аутизмі бар балалар оқитын алғашқы бақылау сыныбын іске қосуға мүмкіндік алдық. Олар өзге балалармен бірге білім алады, оларды міндетті түрде тьюторлар алып жүреді. Яғни оларда әлеуметтенуге мол мүмкіндіктер бар»,-деді көрменің ұйымдастырушысы Әлия Әбдібаитова.

Іс-шараның аясында «Өзгелермен бірге болғым келеді» атты тақырыпта фотокөрме ұйымдастырылып, онда жас фотосуретші Артур Ыдырысовтың аутизмі бар балалардың мектептегі оқу үдерісі бейнеленген туындылары ұсынылды.

«Балалардың барлығы олардың дене және интеллектуалдық еркшеліктеріне қарамастан білім алуға құқылары бар, яғни бәрін түзетуге болады, бәріне көмек қажет. Осы көрме арқылы біз осы бағыттағы жұмыстардың барлығын істеуге болатындығын көрсеткіміз келді»,-дейді Ә.Әбдібаитова.

Еске сала кетейік, Астанада аутизмі бар мектеп жасындағы 150 бала өмір сүріп жатыр.

Индира Кауметова

Фото Азамат Алиев