Германияда Қазақстан экономикасының күні өтті

16 Сәуір, 2015 18:23

Германияның Шверин қаласында «Қазақстан жолы 2050: қазақ-герман ынтымақтастығының қазіргі жағдайы және келешек дамуы» тақырыпта Қазақстан Республикасы экономикасының күні өтті. Аталған шараны Қазақстанның Германиядағы Елшілігінің бастамасымен Мекленбург – Алдаңғы Померания Федералдық жерінің үкіметі мен Шверин қаласының Сауда-өнеркәсіп палатасы бірігіп ұйымдастырды, деп хабарлады ҚР СІМ.

«Қазақстан-2050» Стратегиясында және «Нұрлы жол – Болашаққа бастар жол» Жаңа экономикалық саясатында қойылған мәселелерді жүзеге асыруға арналған осы шараға Бундестаг депутаты Карин Штренц, Мекленбург-Алдынғы Померания Федералдық жерінің Экономика, құрылыс және туризм министрлігінің статс-хатшысы Штефан Рудольф, ҚР ГФР-дағы елшісі Болат Нүсіпов және Шверин қаласының Сауда-өнеркәсіп палатасының президенті Ханс Тон қатысты.

Қазақстандық дипломат өз сөзінде «Нұрлы жол – Болашаққа бастар жол» Жаңа экономикалық саясаты аясында герман бизнесі үшін Қазақстандағы мүмкіндіктер туралы баяндап берді. Қазақстан мен Германия арасында әртүрлі салаларда ынтымақтастықты кеңейтуге жақсы мүмкіндіктер пайда болғандығы аталып өтті.

Бундестаг депутаты К. Штренц екі ел арасындағы белсенді әрі сенімді саяси сұхбатты және қазақ-герман экономикалық ынтымақтастығының жақсы әлеуетін атап өтті. Өз кезегінде, Х. Тон осындай форумдардың маңыздылығын және өңіраралық сұхбаттың тұрақты дамуын атап өтіп, ү.ж. шілде айында Мекленбург-Алдаңғы Померания Федералдық жері экономикалық делегациясының Қазақстанға жоспарланған іс-сапары туралы мәлім етті. Ш. Рудольф аталған сапардың мақсаттарымен және басымдықтарымен таныстырып, неміс компанияларының «ЭКСПО-2017» халықаралық көрмесіне белсенді қатысуға шақырды.

Жалпы форумда жаңартылатын энергия көздері, логистика, азық-түлік өнеркәсібі, денсаулық сақтау, «дуалды» білім беру және туризм секілді екіжақты экономикалық ынтымақтастықтың өзекті тақырыптарын талқыланды.

Барлық жаңалықтар