Қарағанды облысының тауарлары мен қызметтерінде жергілікті қамту 67 пайызды құрады

15 Сәуір, 2015 16:23

Қарағанды облысында сатып алу үдерісіндегі қазақстандық қамту 67 пайызды құрады, 2014 жылы 2013 жылмен салыстырғанда жергілікті қамту үлесі 68,5 миллиард теңгеге артқан. Бұл туралы Қарағанды облысы әкімінің орынбасары Әнуар Ахметжанов Астанадағы VI «Қазақстандық өнім жасаймыз» форумының барысында айтты.

«Біз бүгін жергілікті қамту үлесін арттыруда жақсы жетістікке қол жеткіздік. Өткен жылдың қорытындысы бойынша жүйеқұраушы кәсіпорындар 400 миллиард теңгеге тауарлар сатып алды, ал аймақтағы тауарлар мен қызметтердің, атқарылған жұмыстардың арасында қазақстандық қамту 290 миллиард теңгені немесе 67 пайызды құрады»,-деді Ахметжанов.

Оның сөзінше, жергілікті қамту тауарлар бойынша 54 пайызға, жұмыстар бойынша 96 пайызға, артқан. «2013 жылдың қорытындысымен салыстырғанда қазақстандық қамтудың жалпы құны 68,5 миллиард теңге болды»,-деді әкімнің орынбасары.

Бұл ретте ол жүйеқұраушы кәсіпорындардың сатып алуларының арасында ең үлкен үлес «Қазақмыс» компаниясына тиесілі екендігін атап өтті.

«Қарағанды облысы жүйеқұраушы кәсіпорындардың сатып алуларындағы жергілікті қамту бойынша көшбасшы деуге болады»,-деді Ахметжанов.

Естеріңізге сала кетейік, «Қазақмыс» ірі тау-кен және металургиялық корпорациясы VI «Қазақстандық өнім жасаймыз» атты форум ұйымдастырып, оған 315 отандық өндіріс кәсіпорындары мен 755 ірі компаниялар мен шағын және орта бизнес субъектілерінің, мемлекеттік органдар мен даму институттарының өкілдері қатысуда.

Индира Кауметова

Фото Азамат Алиев

Барлық жаңалықтар