«Қазақмыс» өндірісті жаңғыртуға 1,5 миллиард доллардан астам қаржы бөледі (ФОТО)

15 Сәуір, 2015 14:17

Алдағы 5 жылда «Қазақмыс» корпорациясы өндірісті жаңғыртуға 1,5 миллиард доллардан астам қаржы бөледі, деп хабарлады «Қазақмыс» корпорациясы» ЖШС Бас директоры Бахтияр Қырықпышев VI «Қазақстандық өнім жасаймыз» форумында.

«Өткен жылы 250 тонна мыс шығарылған, 2014 жылы инвестициялар жұмыс істеп тұрған өнеркәсіп құрылғыларын қолдауға ғана емес, өндірісті кеңейту жұмыстарына да бөлінді. Жалпы алғанда алдағы 5 жылда «Қазақмыс» өндірісті жаңғыртуға 1,5 миллиард доллардан астам қаржы бөледі»,-деді ол.

Бас директордың сөзінше, Жезқазған аймағындағы 2010-2014 жылдардағы іздестіру-барлау жұмыстарына 3,5 миллиард теңге бөлінді. Осы уақыт аралығында Жезқазған, Қарағанды, Балқаш алаңдарында 700 мың метр жерасты ұңғыланып, 3 миллиард тонна кен өндірілген.

Айта кетейік, «Қазақмыс» табиғи ресурстардың қазба жұмыстарын жүргізу мен қайта өңдеу саласындағы жетекші компания, Қазақстандағы ең ірі мыс өндіруші. Компания құрамына 10 кеніш пен 5 тау-кен байыту фабрикасы, 2 мыс балқыту зауыты мен 2 көмір бөліністері кіреді.

«Қазақмыс» метал өндіру мен оны қайта өңдеумен айналысатын өндіріс нысандарын басқарады. 2014 жылы компания жеке өздері өндірген кеннен 295,2 мың тонна катодты эквиваленттегі мыс пен 2 946 келі құйма алтын өндірген.

Бұған қоса «Қазақмыс» әлем бойынша ең ірі күміс өндірушілердің бірі. Өткен жылы ұжым 329 тонна күміс өндірді.

Индира Кауметова

Фото Азамат Алиев