Қазақстанның Қытайдағы Елшісі ҚХР Төрағасына сенім грамоталарын тапсырды

15 Сәуір, 2015 14:53

Пекинде Қазақстан Республикасының Қытай Халық Республикасындағы Төтенше және Өкілетті Елшісі Шахрат Нұрышев Қытай Халық Республикасының Төрағасы Си Цзиньпинге сенім грамоталарын тапсырды, деп хабарлады ҚР СІМ.

Рәсімнен кейін Қытай басшысымен өткізілген сұхбат кезінде қазақстан-қытай екіжақты қатынастардың қазіргі жағдайы мен келешегі, алда жоспарланған жоғары деңгейдегі сапарлар талқыланды.

Си Цзиньпин ҚР мен ҚХР ықпалдастықтың түрлі салаларында әлі көптеген жобаларды ілгерілетіп, жүзеге асыруы тиіс деп атап өтті.

«ҚХР басшысы «Жібек жолының экономикалық белдеуі» бастамасын алғаш рет 2013 ж. қырқүйекте Назарбаев Университетінде жария еткенін ерекше атап өтті. Осы орайда, бұл бағытты екіжақты ынтымақтастық шеңберінде бірлесіп дамытуға үміт білдірді. Сонымен қатар, ҚР Президенті Н. Назарбаевқа жылы сәлемін жолдады», - делінген хабарламада.

Өз кезегінде, Шахрат Нұрышев ҚР Президенті Н. Назарбаевтың атынан жолданған жылы лебізі мен сәлемін жеткізді.

Қазақстанның Елшісі, сонымен қатар, ҚР Президенті Н. Назарбаевтың «Нұрлы жол» Жаңа экономикалық саясаты және ҚХР Төрағасы Си Цзиньпинның «Жібек жолының экономикалық белдеуі» бастамалары бір-бірін өзара толықтыратынын және олардың іске асырылуы Қазақстан мен Қытай қатынастарын зор нығайтатынын атап өтті.

Ш. Нұрышев қазақстандық тарап Қытаймен екіжақты және көпжақты форматтарда өзара тиімді ынтымақтастықты одан әрі дамытуға дайын екенін білдірді.