Қызылорда облысында БЖК бойынша 142 млн теңгенің 10 жобасы қаржыландырылды
Аймақта белсенді кәсіпкерлердің 80 пайызы Қызылорда қаласында болса, қалған 20 пайыз аудандарға тиесілі. Сол себепті де ауылдық жерлерде кәсіпкерлер санын көбейту керектігі айтылды. Өткен жылы ауыл кәсіпкерлерін қолдау мақсатында 53 млрд. теңге бөлінген.
2014 жылы бизнесті дамытуға бағытталған шаралар туралы баяндады. Өткен жылы өңірге мемлекеттік бағдарламалар аясында 17 млрд. теңге бөлінгенін айтады. Оған мыңнан астам жоба қаржыландырылған. Ал, «Бизнестің жол картасы - 2020» бағдарламасын жүзеге асыруға былтыр 1 млрд. 445 млн. теңге қаралған. Аудандарда бұл бағыт бойынша жалпы құны 142 млн. теңгені құрайтын 10 жоба субсидияланды.
Аймақтың әлеуетін арттыру үшін отандық өнімді экспортқа шығару маңызды. Осы орайда өңірдің негізгі дақылы саналатын күрішті эксспорттап, ет өнімдерін шетелге шығару жолдарын қарастыру сөз етілді.
Негізінен, Қызылорда облысында ауылшаруашылық өнімдерін әртараптандыру жүйелі жүргізілуде. Осының нәтижесінде негізгі дақыл бойынша рекордтық өнім алынды. Сондай-ақ, мемлекеттік бағдарламалардың қолдауымен басқа да дақылдарды егуге жағдай жасалуда. Оларға берілетін субсидияның көлемі де ұлғайған. Енді күріштен басқа бақша дақылдарын еккен кәсіпкер мемлекеттің зор қолдауына ие болмақ. Бақша дақылын кәдімгі суармалы әдіспен еккен адамға тиесілі субсидиясы төленсе, ал тамшылатып суару әдісін қолданған еңбек адамына берілетін субсидия көлемі едәуір. Сондай-ақ, жиында мал шаруашылығын дамыту да сөз болды. Қазір облысты буферлік аймақтан шығару үшін жұмыстар атқарылып жатыр. Егер бұл жоспар биыл жүзеге асатын болса, жылына 100 мың тонна ет экспортқа шығарылады деп жоспарлануда.
