Б.Сағынтаев «Тоталь» компаниясының басшысымен мұнай-газ саласындағы ынтымақтастықты талқылады
14 Сәуір, 2015 17:58
Бүгін Үкімет үйінде ҚР Премьер-Министрінің бірінші орынбасары Бақытжан Сағынтаев «Тоталь» компаниясының басшысы Патрик Пуяннемен кездесті, деп хабарлады primeminister.kz.
Әңгімелесу барысында мұнай-газ саласындағы ынтымақтастық пен Қашаған кен орнын игеру жобасын іске асыру мәселелері талқыланды. Сондай-ақ, тараптар Ақтөбе облысында геологиялық-барлау жұмыстарын жүргізу барысын да қарады.
Бақытжан Сағынтаев «Тоталь» компаниясының 20 жылдан астам уақыт бойы Қазақстанда табысты жұмыс істеп келе жатқандығын және ірі стратегиялық инвесторлардың бірі екенін атап өтті.
Кездесу қорытындысы бойынша әңгімелесушілер мұнай-газ саласындағы ынтымақтастықты одан әрі тереңдетуге мүдделі екендіктерін білдірді.
