14 Сәуір, 2015 17:12

Литва Қазақстанның «ЭКСПО-2017» көрмесіне шақыруын қабыл алды

«ЭКСПО-2017» көрмесінің комиссары, Сыртқы істер министрінің бірінші орынбасары Рәпіл Жошыбаев бастаған қазақстандық делегацияның Литва Республикасына сапар жасады, деп хабарлайды еліміздің Сыртқы істер министрлігі.

Сапардың мақсаты – Литва Республикасының өкілдерін Халықаралық «ЭКСПО-2017» көрмесіне шақыру және екі ел арасындағы ынтымақтастықтың болашағын талқылау.

СІМ ақпараты бойынша, сапар барысында делегация өкілдері Литва Үкіметінің Канцлері Альминас Мачюлиспен, «ЭКСПО-2017» көрмесіне қатысуға жауапты Қоршаған ортаны қорғау министрі Кестутис Тречиокаспен және Көлік және коммуникация министрі Рокас Масюлиспен кездесті.

Литва Канцлерімен болған жүздесуде тараптар екіжақты ынтымақтастық пен Литва Премьер-Министрі Альгирдас Буткявичусьтің биылғы жылдың мамыр айына жоспарланып отырған Қазақстанға сапарына қатысты мәселелерді сөз етті.

Р.Жошыбаев Қазақстан Президенті Нұрсұлтан Назарбаевтың Литва Республикасының Мемлекет басшысы Даля Грибаускайтеге «ЭКСПО-2017» көрмесіне ресми шақыруын жолдады. Өз кезегінде Литва басшысы Қазақстан Президентінің шақыруын қабыл алды. Энергетика министрлігінде болған кездесуде энергетика саласындағы байланыс пен Литваның жаңғыртылатын энергия саласы бойынша жобаларына қатысты мәселелер талқыланды.

Р.Жошыбаев «ЭКСПО-2017» көрмесінің баламалы энегрия көздерін дайындау мен пайдалануға тың серпін беріп, осы саладағы ең үздік деген технологиялардың таныстырылымын жасап, энергетикалық тиімді бағдарламаларды жүзеге асыруға мүмкіндік беретіндігін атап өтті.

Естеріңізге саламыз, қазақстандық делегация 15-сәуір күні Латвияға барады.

Барлық жаңалықтар