Астанада «Бақытты отбасы» жобасы аясында әкелер форумы өтті

14 Сәуір, 2015 16:08

Астанада «Бақытты отбасы» партиялық жобасының шеңберінде «Әкелер одағы» ҚБ қолдауымен, отбасы институтын нығайту мен дамыту арқылы балаларға толыққанды тәрбие беруге бағытталған Форум өтті, деп хабарлады «Нұр Отан» партиясының баспасөз қызметі.

Шараның мақсаты – жағымды отбасының бейнесін дәріптеу, балаларды тәрбиелеудегі әкелердің рөлін күшейту, отбасы институтын насихаттау, ізгілікті-рухани құндылықтар негізінде қоғамда белсенді азаматтарды қалыптастыру.

Өз кезегінде, қалалық мәслихаттың депутаты, Астана қаласындағы №59 мектеп-лицейінің директоры Зәуре Жүсіпова өскелең ұрпақты дұрыс тәрбиелеу –табысты қоғам құрудың кілті болып табылады деп есептейді.

«Әр бала – отбасының, әр азамат – мемлекеттің көрінісі» деген сөз бекер айтылмаған. Сондықтан да отбасы институты мен құндылықтарды қолдау барлық уақытта да өзекті. Бала тәрбиесі – жеңіл жұмыс емес, онда әкенің де, шешенің де қатысы теңдей болуы тиіс. Әсіресе, әкенің рөлі өте маңызды, өйткені ол баласы үшін еліктеудің нағыз үлгісі және ең басты кеңес берушісі. Біз өз мектебімізде әкелерді ата-аналар жиналысына және басқа да іс-шараларға тартуға тырысамыз», - дейді Зәуре Жүсіпова.

Қатысушылар отбасы институтын дәріптеу және сондай-ақ әкелерді балалар тәрбиесі үдерісіне тарту үшін осындай іс-шараларды өткізудің уақыты пісіп-жетілгенін атап өтті.

Айта кетейік, «Бақытты отбасы» жобасы отбасы институтын, адамгершілікті, отбасы құндылықтарын дәріптеу арқылы руханилықты нығайтуға арналған. Жоба аясында партия филиалдарында 130 тақырыптық қабылдаулар өткізіліп, 180 мыңға жуық отбасыға кеңес берілді.

Барлық жаңалықтар