Алматыда тоғызқұмалақтан ІІІ әлем чемпионаты өтуде

Әлемдік деңгейдегі бұл ірі спорттық шара Дүниежүзілік тоғызқұмалақ федерациясы, Қазақстан Республикасы Мәдениет және спорт министрлігі, Алматы қаласы әкімдігінің ұйымдастыруымен өткізілгелі отыр.

Әлем чемпионатында төрт құрлықтың 23 елінен келген спортшылар өнер көрсетеді. Атап айтсақ, АҚШ, Антигуа мен Барбуда, Ауғанстан, Әзірбайжан, Гана, Германия, Грузия, Италия, Колумбия, Молдова, Қазақстан, Қырғызстан, Қытай, Моңғолия, Өзбекстан, Ресей, Тәжікстан, Түркия, Түркменстан, Үндістан, Ұлыбритания, Чехия, Швейцария сияқты мемлекеттерден барлығы 50-ден астам спортшы қатыспақ. Чемпионат ерлер және әйелдер арасында жеке-жеке классика, рапид, блиц бойынша өткізіледі.

Зияткерлік тоғызқұмалақ ойыны соңғы жылдары жоғары қарқынмен дамып келеді. Дүниежүзілік және Республикалық Тоғызқұмалақ спорты федерациялары, Қазақстан Республикасы Мәдениет және спорт министрлігі, облыс әкімшіліктерінің қолдауы арқасында бұл ойынмен шұғылданушылардың саны 100 мың адамнан асты.

Тоғызқұмалақ Лондон (2006), Пардубице (2007), Каннда (2009) өткен дүниежүзілік зияткерлік фестивальдары мен олимпиадалардың бағдарламасына енгізілген. 2008 жылы Дүниежүзілік тоғызқұмалақ Федерациясы құрылды. Осының арқасында, бүгінгі күні қазақтың ұлттық ойыны бойынша халықаралық жарыстар Германия, Ұлыбритания, Ресей, Швейцария, Чехия, Түркия, Монғолия, Қырғызстан, Өзбекстан, Антигуа мен Барбуда және т.б. елдерде тұрақты түрде өткізіледі.

Тоғызқұмалақтан тұңғыш әлем чемпионаты 2010 жылы Астана қаласында, ІІ әлем чемпионаты 2012 жылы Чехияның Пардубице қаласында өткендігін еске саламыз.