Ақтөбе облысында «Саламатты Қазақстан» бағдарламасы іске қосылғалы бері 26 денсаулық сақтау нысаны салынды

14 Сәуір, 2015 12:34

Ақтөбе облысында «Саламатты Қазақстан 2011-2015» бағдарламасы іске қосылғалы бері, 26 денсаулық сақтау нысаны салынды. Оның ішінде 5 аурухана «100 мектеп 100 аурухана» бағдарламасының аясында, 19 нысан 350 дәрігерлік амбулаториялар мен медициналық тіректер бағдарламасы аясында, 2 нысан мемлекеттік-жеке әріптестік аясында іске қосылды, деп хабарлайды аймақтың ішкі саясат басқармасы.

Бағдарламаны жүзеге асыру кадр әлеуетін артыруға мүмкіндік берді. Бүгінгі таңда медициналық мекемелерде 3 мың 702 дәрігер мен 5 мың 542 орта деңгейдегі медицина қызметкерлері жұмыс істейді.

«Денсаулық сақтау мемлекеттік бағдарламасын жүзеге асырудың нәтижесінде оңды жетістіктерге қол жеткізілді. Осылайша, 2014 жылдың қорытындысы бойынша, тұрғындар арасындағы өлім көрсеткіші 7,0 пайызға төмендеп, туу көрсеткіші керісінше, 24,16 пайызға артты, болжамды өмір жасының ұзақтығы 71,6 пайызға дейін өсті»,-делінген хабарламада.

Сондай-ақ Ақтөбе облысында тұрғындарды ұлттық скринингтік бағдарламамен қамтамасыз ету 2011 жылы 99,0 пайызды құрап, тұрғындардың қарауды қажет ететін 211 мың 614 адамының арасынан 209 мың 464 адам тексерілді. Олардың 5 мың 296 ауру болып табылды.

Бағдарламаның алдағы уақыттағы жоспарында медициналық көмектің қолжетімділігін арттыру, Денсаулық сақтаудың бірыңғай ұлттық жүйесін енгізу мәселелері бар.

Барлық жаңалықтар