Қостанай облысының кәсіпкерлеріне 2014 жылы 31,6 миллиард теңге несие берілген

14 Сәуір, 2015 11:41

Қостанай облысының әкімі Нұралы Сәдуақасов кәсіпкерлік субъектілеріне қаржылық қолдау көрсету мәселелеріне арналған мәжіліс өткізді, деп хабарлайды облыс әкімдігі.

Мәжіліс барысында кәсіпкерлерге екініші деңгейлі банктер тарапынан қаржылық қолдау құралдарына, аталмыш қаржыға деген қолжетімділік мәселелері мен проблемалар талқыланды.

2014 жылы жалпы берілген несиелердің 16,4 пайызы ғана шағын кәсіпкерлік субъектілеріне берілген. Яғни өткен жылы оларға 31,6 миллиард теңге несие берілген. Салалық бөліністер бойынша алатын болсақ, несиелендірудің басым бөлігі сауда-саттықтың үлесіне тиеді, бұл бағытқа 69,1 пайыз несие бөлінсе, қайта өңдеу өнеркәсібіне берілген несиелердің көлемі 12,0 пайыз.

Аймақ басшысы Нұрады Сәдуақасов мемлекеттің бизнесті қолдау бағытындағы бағдарламаларымен жұмыс істеуге барлық банктер бірдей белсенділік таныта бермейтіндігін атап өтті. Мәжілісті қорытындылаған облыс әкімі қаржы институттарының өкілдеріне облыстың барлық аудандарында өздерінің желісі бойынша филиалдар құру қажеттігіне назар аударды. Сондай-ақ ауылдық аймақтардағы кепілдікке қойылатын мүліктерді бағалау көзқарасын қайта қарау қажет. Қаржы институттарының өкілдері ауылдық аймақтармен жұмыс барысында сол аймақтың ерекшеліктерін ескерулері керек.

«Егер біз бизнесті қолдамасақ, жағдайдың күрделенуі мүмкін екендігін біз жете түсінуіміз керек. Кәсіпкерлердің мемлекеттік бағдарламаларға қатысуларына ешқандай кедергі болмауы тиіс»,-деді Н.Сәдуақасов.

Барлық жаңалықтар