Перуде қазақстандық ауыр атлетшілер жоғары көрсеткішке ие болды

14 Сәуір, 2015 14:02

2015 жылдың 8 және 12 сәуірі арасында Лимада (Перу) Ауыр атлетикадан жасөспірімдер арасындағы әлем чемпионаты өтті, деп хабарлады Мәдениет және спорт министрлігі.

Беделді жарысқа әлемнің түкпір-түкпірінен келген 189 ауыр атлет қатысты. Әлемдік біріншіліктегі Қазақстан мәртебесін алты спортшы қорғаған болатын.

Игорь Сон (50 кг) және Татьяна Капустина (+69 кг) жарыстың алтын жүлделерін қанжығаларына байлап қана қоймай, көрермендердің дауыс беруі нәтижесінде 17 жасқа дейінгі ұлдар мен қыз балалар арасындағы әлем чемпионатының ең үздік ауыр атлетшілері атанды.

Сонымен қатар Қазақстан қоржынына Әйгерім Әуілбек (58 кг) күміс, Шыңғыс Сағындықов (85 кг) қола жүлдеден байлады.

Жалпы есептегі жүлделермен қатар спортшыларымыз жұлқи көтеру мен оқыс серпуден кіші жүлделерді жеңіп алды: үш алтын медаль (Игорь Сон - 2, Татьяна Капустина - 1), екі күміс (Әйгерім Әуілбек - 1, Татьяна Капустина - 1) және екі қола жүлде (Әйгерім Әуілбек - 1, Шыңғыс Сағындықов - 1).

Барлық жаңалықтар