Қорғаныс министрлігі әскери мектеп түлектері арасындағы «Сардар» олимпиадасын аяқтады

14 Сәуір, 2015 10:26

Астанадағы генерал-майор С.Нұрмағамбетов атындағы республикалық «Жас ұлан» мектебінде еліміздегі республикалық мектеп-интернаттардың, облыстық әскери мектептердің және жалпы білім беру мекемелерінің түлектері арасындағы екінші Республикалық «Сардар» кешенді олимпиадасының жеңімпаздары анықталды.

Қорғаныс министрлігі хабарлағандай, екі күн бойы Қазақстанның барлық облыстарынан, Астана, Алматы қалаларынан 60-тан аса бала теориялық және практикалық білімдерін сынады.

Байқау қорытындысы бойынша Республикалық «Сардар» кешенді олимпиадасының Гран-при жүлдесін республикалық «Жас ұлан» мектебі (Нұртас Қадыров) иеленді. Түлектер 3000 м, 100 м жүгіру, ішті қатайту, жеке саптық даярлық және АК-74 автоматын бөлшектеу және жинау бойынша сынақтар тапсырғанын айта кеткен жөн.

Олимпиада еліміздегі азаматтық және әскери оқу орнының түлектерін зияткерлік қабілеттерін дамытуға, мемлекетіміздегі әскери қызмет пен Қарулы Күштердің абыройын арттыруға ықпал етеді. Сонымен қатар Қазақстанның жоғарғы әскери оқу орындарына түсуге жас буынның даярлығын тексеру болып табылады.

Барлық жаңалықтар