Наполеон Хиллдің атақты «Ойлан және байы» кітабы қазақ тіліне аударылды

«2012 жылдың 14 желтоқсанындағы  Қазақстан халқына жыл сайынғы жолдауында Мемлекет басшысы Н.Ә.Назарбаев қазақстандық жастарға қызықты қазіргі заманның жүздеген кітаптарының тізімін жасап, соларды қазақ тіліне аударуды ұсынған. Қазақстанның жас кәсіпкерлер қауымдастығы еліміз үшін жас кәсіпкерлер дамуының маңызын ескере отырып жастарды кәсіпкерлікке шақыратын атақты әлемдік әдебиеттерді аудару «Шабыт» жобасын қолға алды. Жоба Наполеон Хиллдің «Ойлан және байы» кітабы мен Бодо Шефердің «Қаржылық тәуелсіздікке жол» кітаптарын аударумен басталды», - делінген хабарламада.

Қазақстанның жас кәсіпкерлер қауымдастығы аталмыш кітаптарды ЖОО кітапханаларына, ауыл кітапханалары мен жас кәсіпкерлер арасында таратуды жоспарлап отыр.

Айта кету керек, Хилл мен Шефер еңбектері әлемдік деңгейде өте танымал туындылар қатарына жатады.

Наполеон Хилл ақша табудың құпияларын ашады. Осыны оқыған мыңдаған кәсіпкерлер өзіндік қор қалыптастырып, оны көбейтуде автордың кеңестерін игіліктеріне жаратып жатыр.

Өз кезегінде Бодо Шефер оқырмандарға қарапайым және тиімді әдістерін қолданып қорды сақтап қалу мен көбейту жолдарын ұсынады.