Жамбыл облысының әкімі аймақтағы ірі су қоймаларының жай-күйін тексерді

Аймақ басшысы Қордай ауданында орналасқан «Қорақоңыз» және «Қақпатас» су қоймаларында болды.

Бұдан бұрын облыс басшысы Жуалы ауданында да болып, «Теріс-Ащыбұлақ»  су қоймасының және «Көксай» айналма каналының жұмысымен де танысқан болатын.

Жалпы, Жамбыл облысы Төтенше жағдайлар департаментінің хабарлауынша, аймақтағы жағдай бірқалыпты, су қоймалары мен көлдердің толуы 70-75 пайызды құрап отыр, олар күнделікті бақылауға алынған. Дегенмен, аймақ басшысы құзыретті органдардың басшыларына су қоймалары мен бөгендердің техникалық жағдайларын күнделікті тексеріп тұруды тағы да тапсырды.

Қазіргі уақытта Жамбыл облысында 117 су қоймасы бар, оның 5-і республикалық, 7 – жеке, ал 105 коммуналдық меншікте. 2011 жылдан бері 42 нысанға жөндеу жұмыстары жүргізілген, үстіміздегі жылы 11 нысанға жөндеу жұмыстарын жүргізу жоспарлануда.