Әскерилер Жеңістің 70 жылдығы құрметіне өткізілетін парад үшін топтық ұшуларға дайындық басталды (Фото)
13 Сәуір, 2015 12:56
Балқаш қаласының маңында орналасқан 53898 әскери бөлімінің авиациялық оқу-жаттығу орталығында ҚР ҚК ӘҚК Әскери-әуе күштерінің әскери-көліктік авиациясы ұшу құрамының жиыны басталды, деп хабарлады Қорғаныс министрлігі.
Жиынға авиациялық техниканың 7 бірлігі қатысуда. Оның құрамына С-295, Ан-72, Ан-26 ұшақтары және ұшу-көтеру құрамының 33 әскери қызметшісі тартылған. Бұл жиынның мақсаты – экипаждарды топ құрамында үйлесімді ұшуға дайындау.
Олар Ұлы Отан соғысындағы Жеңістің 70 жылдығына арналған әскери парадта сап түзеп ұшатын болады. Жиын ҚР ҚК ӘҚК Әскери-әуе күштерінің қолбасшысы басқармасындағы тәжірибелі нұсқаушы ұшқыштардың жетекшілігімен өткізілуде.
Нұсқаушы ұшқыштар жас буынмен өздерінің бай тәжірибесімен бөліспек. Жиын барысындағы ұшулар бірнеше ұшақтан құралған топпен ең төмен биіктікте, парадтағы ұшуларға барынша ұқсас жағдайларда орындалып, онда ұшқыштар өз шеберліктерін қосымша пысықтай түсетіндіктерін атап өткен жөн.
