Маңғыстау облысының әкімдігі мен Корея Республикасы денсаулық сақтау саласындағы ынтымақтастықты жетілдіруде

13 Сәуір, 2015 12:26

Маңғыстау облысының денсаулық сақтау басқармасы мен Кенги провинциясының денсаулық сақтау департаменті (Оңтүстік Корея) денсаулық сақтау мен медицинаны дамытуда өзара түсіністік жөніндегі меморандумға қол қойды, деп хабарлайды облыс әкімдігі.

Оған сәйкес, болашақта тараптар бір-бірімен кадр алмасып, медицина саласындағы мамандар мен қызметкерлердің біліктіліктері жетілдіріліп, оқып, білім алатын болады. Сондай-ақ маңғыстаулықтар медициналық құрылғылар туралы ақпарат алмасып, кең таралған аурулар мен сырқаттар бойынша жүргізіліп отырған саясат тәжірибесінен сабақ алады. Бұған қоса, тараптар медицина саласы бойынша ұйымдастырылатын симпозиумдер, конференциялар мен өзге де жиындар бойынша ұйымдастыру жұмыстарына қолдау көрсетеді.

«Меморандум аясында біз мамандарды оқытуды жоспарлап отырмыз, әзірге біз дәрігерлердің бағыты мен санын нақты анықтаған жоқпыз. Бірақ негізгі бағыт онкология болатын шығар деп болжамдап отырмыз. Облыстың медициналық ұйымының басшысы жылына қызметкерлердің 10 пайызына дейін біліктіліктерін жетілдіруге құқылы. Біз Маңғыстау облысындағы онкологиялық диспансер құрылысы аяқталған соң да кореялық мамандарды осы өңірде шеберлік сабақтарын өткізуге шақырамыз»,-дейді Маңғыстау облыстық денсаулық сақтау басқармасының жетекшісі Клара Оралбаева.

Облыстық басқарма онкологиялық аурулардың ауыр түрімен науқастанған азаматтарды Кореяға да жіберіп емдетпекші.