• Басты
  • ҚР ҰКП бизнестің әлеуметтік жауапкершілігі бойынша Ұлттық Тұжырымдаманың жобасын таныстырды (ФОТО)

ҚР ҰКП бизнестің әлеуметтік жауапкершілігі бойынша Ұлттық Тұжырымдаманың жобасын таныстырды (ФОТО)

10 Сәуір, 2015 17:13
Бүгін «Атамекен» ұлттық кәсіпкерлер палатасы Премьер-Министрдің орынбасары Бердібек Сапарбаевтың төрағалығымен өткен Әлеуметтік әріптестік пен әлеуметтік еңбек қатынастарын реттеу жөніндегі республикалық үшжақты комиссияның кезекті мәжілісінде бизнестің әлеуметтік жауапкершілігі бойынша Ұлттық Тұжырымдаманың жобасын таныстырды.

«Әлеуметтік жауапкершіліктің элементтерін енгізу кәсіпкерлер үшін біршама басымдылықты қамтамасыз етеді. Тұрымдаманы жүзеге асыру экономиканың бәсекеге қабілеттілігін көтеріп, бизнестің жауапкершілігін арттырады және Қазақстанның Экономикалық ынтымақтастық және даму ұйымына кіру режимін жеңілдетіп, әлеуметтік-еңбек қатынастарының тұрақтылығын қамтамасыз етеді»,-деді «Атамекен» ҰКП Басқарма төрағасы Нұржан Әлтаев. 

Бұл ретте бизнесті ынталандыру әлеуметтік жауапкершілікті қалыптастыратын ортаны жетілдіру мен әлеуметтік инвестициялау бағытында ұсыныстар енгізілетіндігін атап өту керек.  

«Біз кәсіпорындарды ынталандыру бойынша бірқатар ұсыныстар әзірледік. Әлеуметтік жауапкершілік мәселесін шешу мақсатында үкіметтік емес ұйымдардың мемлекеттік органдармен, мемлекеттік емес ұйымдармен, мекемелермен ынтымақтастығын тереңдетіп, әрі белсендендіру жоспарлануда. Бұл ретте Қазақстанның бизнес-құрылымдары ұлттық заңнама мен халықаралық еңбек ұйымдарының конвенцияларының талаптарын мүлтіксіз орындап, БҰҰ-ның жаһандық келісіміне кіру бағытында жұмыстар жүргізеді»,-деді Н.Әлтаев.

Тұжырымдаманың басты мақсаты- бизнестің жауапкершілігін арттыру үлгісін қалыптастырып, өз кезегінде ол экономикалық, әлеуметтік және экологиялық мәселелерді шешуге ықпал ететін болады.  

«Тұжырымдамаға 7 түрлі әлеуметтік жауапкершілік мәселесі енгізілген. Олар: адам құқығын қорғау, қоршаған ортаны қорғау, тұтынушылардың мүдделері, адал іскерлік тәжірибе, корпоративті басқару, адал еңбек тәжірибесі, қауымдастықтардың тыныс-тіршілігіне араласу мен оларды дамыту»,-деді Әлтаев.  

Бұған қоса, тұжырымдаманы жүзеге асыру мақсатында кәсіпорындардың әлеуметтік жауапкершілігі бойынша өзін-өзі бағалау мен кәсіпорындардың халықаралық талаптар негізіндегі қаржылық емес есептерін дайындау әдісін енгізу көзделуде.  

Индира Кауметова

Барлық жаңалықтар